Tolos sindicatos, menos UXT, llamen a participar masivamente na manifestación de mañana 'escontra la criminalización'

XIXÓN, 21 de Xineru (EUROPA PRESS)

Los principales sindicatos n'Asturies (CC.OO, CSI, Suatea, CXT, CNT y USO, cola ausencia d'UXT) convocaron pa mañana en Xixón una manifestación, que va salir a les 19.30 hores de la plaza l'Humedal, y va percorrer delles cais hasta llegar a la plaza Mayor. Ellí va dase llectura a un comunicáu, que va dir a cargu de Teresa Muñón.

De la mesma manera, los representantes sindicales animen a la población a que participe na manifestación, que lleva como conseña oficial 'Escontra la criminalización de les lluches sindicales y sociales', al oxetu de denuciar los procesos penales abiertos, según ellos, a aquellos trabayadores que defienden los sos puestos de trabayu.

Les organizaciones convocantes van exixir l'anulación de tolos procesos penales a trabayadores y sindicalistes a los que se-yos aplicó'l Códigu Penal cuando defendíen los sos derechos como trabayadores.

Al respecto, tamién va pidise l'anulación de los artículos del citáu Códigu Penal que criminalicen l'actividá sindical y la movilización social, asina como'l puntu 3 del artículu 315, que criminaliza los piquetes y la propaganda de fuelga con penes de tres años de cárcel.

L'actu de protesta ta tamién apoyáu pola Plataforma escontra la Represión y poles Llibertaes, que pide amás la dimisión del delegáu de Gobiernu n'Asturies, Antonio Trevín, y a quien culpen de la "represión" que sufren trabayadores y representantes sindicales.