Les empreses de llimpieza en centros sanitarios unvíen más de mediu centenar de cartes de despidu a los sos trabayadores

Los sindicatos caltiénense "firmes" nos sos reinvindicaciones y sostienen que van cumplir sólo'l 50% de servicios mínimos

Aseguren que n'urxencies, quirófanos, UCI y UVI cúmplense servicios mínimos del 100% y piden que nun se rexistren desperfectos

UVIÉU, 13 de Febreru (EUROPA PRESS)

Les empreses de llimpieza en centros sanitarios entamaron a unviar cartes de despidu a los sos trabayadores pol incumplimientu de los servicios mínimos marcaos pol Serviciu de Salú del Principáu (Sespa) demientres el paru indefiníu entamáu'l 6 de febreru.

Según indicaron fontes sindicales en declaraciones a Europa Press, nesta octava xornada de fuelga se recibieron más de mediu centenar de cartes de despidu --polo menos 46 nel Hospital de San Agustín (Avilés); seis nel Hospital de Cabueñes (Xixón); y dos nel Hospital Universitariu Central d'Asturies (HUCA) n'Uviéu-- y esperen recibir más a lo llargo del día de güei y próximes xornaes.

Sin embargu, los sindicatos qu'apoyen la fuelga, CC.OO, UXT, USO y CSI, caltiénense "firmes" nes sos reinvindicaciones y sostienen que va cumplise sólo'l 50 por cientu de los servicios mínimos porque "dende'l principiu sabotióse la fuelga y nun se va consentir que s'exixa'l 100% d'actividá en tolos puestos", apuntaron.

De la mesma manera, aseguraron que n'urxencies, quirófanos, UCI y UVI cumplen servicios mínimos del 100% ya que son "zones básiques y se respeta'l fundamental funcionamientu del centru". Amás, los responsables sindicales dicen desconocer que se produzan desperfectos nes instalaciones y piden que "nun se llegue a eso".

Pel momentu, sólo la empresa Eulen s'aconceyó ayeri col comité de fuelga del HUCA "anque la ufierta yera la ya conocida ensin novedá, polo que nun s'algamó l'alcuerdu", indicaron los sindicatos. "Nun pidimos dineru, pidimos la igualdá col grupu E", añadieron.

El paru afecta a 950 trabayadores --un 90% muyeres-- col oxetivu d'algamar la igualdá salarial de los emplegaos de la llimpieza d'empreses esternes col grupu E del Sespa, no relativo al cobru del conceutu de Desarrollu Profesional, ya que cuenten cola igualdá n'otros conceptos dende 1984.