Los ganaderos anuncien una "gran movilización" n'Uviéu pal día 26 pola baxada de precios de la lleche n'orixe

UVIÉU, 14 de Marzu (EUROPA PRESS)

Los ganaderos anunciaron güei la celebración d'una "gran movilización" nel centru d'Uviéu pal próximu 26 de marzu, como midida de protesta ante la intención de la industria de baxar los precios que paga pola lleche a los productores.

Asina lo anunció a Europa Press el secretariu xeneral de la Unión de Campesinos Agrarios, UCA, José Calvo, tres participar nuna asamblea de les organizaciones agraries con un grupu de ganaderos representantes de colectivos y grupos d'entrega de lleche.

Enantes de l'asamblea pa organizar les movilizaciones y midíes de protesta a desarrollar, les organizaciones agraries del Principáu caltuvieron un conceyu col presidente de la Federación d'Industries Llecheres del Principáu, Enrique López.

Na mesma dambes partes espunxeron les sos posiciones, anque ensin llegar alcuerdos. "Dende la industria traten de xustificar la baxada de precios, ta claro que defienden los sos intereses y lo que pasa ye que'l ganaderu ye'l que siempre sal perdiendo", dixo Calvo.

El conceyu calteníu n'Asturies ye paralelu al que se fizo a nivel nacional, nel que la industria llechera y productores alcordaron entamar un procesu de negociación sobre'l preciu de la lleche n'orixe.

Per otru llau les principales organizaciones agraries del Principáu van caltener el próximu llunes un conceyu cola conseyera de Mediu Ambiente y Desarrollu Rural, Belén Fernández, na que van plantega-y la preocupación del sector ante la situación que tán sufriendo.