ArcelorMittal y sindicatos lleguen a un preacuerdu pa integrar 300 trabayadores de les auxiliares

UVIÉU, 10 de Xunetu (EUROPA PRESS)

ArcelorMittal y los sindicatos UXT, CC.OO y USO algamaron güei un preoacuerdu que va permitir integrar a 300 trabayadores de les auxiliares na empresa siderúrxica. L'acuerdu algamóse al aceptar la empresa retirar la llende d'edá y el criteriu de preselección pa incorporar a los trabayadores, según confirmaron a Europa Press fontes sindicales.

De primeres, la empresa exixía aplicar na selección del personal los mesmos criterios qu'usa la multinacional y qu'establecen una llende d'edá de 48 años. Ésti foi ún de los motivos qu'orixinó que CC.OO se llevantare'l pasáu miércoles de la mesa de negociación. La empresa aconceyóse a primer hora d'esta mañana colos sindicatos qu'algamaron un principiu d'acuerdu. Los sindicatos deben agora someter el documentu que presentó la compañía a les asamblees.

Una vez revalidáu l'acuerdu polos trabayadores, ta pendiente de negociase los puestos a integrar y los que van ocupar esos puestos. D'eso va ocupase una comisón de siguimientu. Fontes de la empresa esplicaron a Europa Press que la voluntá de la compañía ye entamar los trabayos "lo primero posible" previsiblmente, la próxima selmana. Estes mesmes fontes refugaron comentar los términos del documentu al que güei dieron el preste los sindicatos.

Pela so parte, CC.OO calificó de "mui positivu" l'acuerdu dempués de llograr que se retirare la bolsa de personal eventual y que s'evitare la llende d'edá. Los 300 trabayadores van incoprorase a ArcelorMittal a partir d'ochobre.

En cuanto a los otros 200 trabayadores de les auxiliares, el compromisu ye prexubilar a 150, con edaes que ronden los 58 y 59 años. Estos trabayadores van pasar a un espediente de regulación d'emplegu hasta cumplir los 60 años. Los otros cincuenta trabayadores van siguir na plantiya de la so actual empresa. CC.OO garantizó l'emplegu pa toos y que "nun va adoptase nenguna midida traumática pa naide".

"Vamos siguir la fórmula que se fizo en Suzuki o Duro Felguera de manera que los trabayadores con 58 años van dir pa casa", informó CC.OO.

Pal sindicatu, "el xiru que dio la situación supón un gran avance, dao que les negociaciones algamare un puntu mui peligrosu, poniendo en grave riesgu la estabildiá del emplegu y el futuru de la siderurxa n'Asturies".

El sindicatu tamién apuntó qu'esti procesu nun supón "nueves contrataciones" sinón "una reorganización interna entamada pol xigante siderúrxicu pa recomponer la so estructura interna, tres la cayida del mercáu".

Dende la Federación d'Industria de CC.OO, confíase en que les negociaciones lleguen a bon términu pa tol colectivu d'auxiliares integráu por más de 2.300 trabayadores.