El Consitucional avala la Llei d'Usu del Asturianu y la obligación de l'Alministración d'almitir escritos nesta llingua

Refuga la cuestión d'inconstitucionalidá que formulara'l Xulgáu d'Uviéu por un recursu del abogáu Xurde Blanco

UVIÉU, 08 de Marzu (EUROPA PRESS)

El Tribunal Constitucional (TC) refugó a lo último la cuestión d'inconstitucionalidá contra la Llei de Promoción y Usu del Bable/Asturianu, presentada pol Xulgáu de lo Contencioso Alministrativo d'Uviéu, tres plantegar el lletráu del Principáu, Xurde Blanco, un recursu contra una resolución que-y refugaba la solicitú d'un permisu llaboral por tar redactada n'asturianu.

La cuestión presentárala'l Xulgáu de los Contencioso Alministrativo númberu 3 d'Uviéu, n'almitiendo a trámite'l recursu que l'abogáu presentó'l 19 de marzu, dempués de que l'Alministración refugare la tramitación de la solicitú d'un permisu presentada por él, por tar escrita n'asturianu.

La mentada cuestión d'inconstitucionalidá referíase a que "delles partes de la Llei de Promoción y Usu del Asturianu podríen contradicise con dos artículos de la Constitución: el 3.2 (les demás llingües españoles serán tamién oficiales nes respectives Comunidaes Autónomes d'acordies colos sos Estatutos); y el 81.1 (son lleis orgániques les relatives al desarrollu de los derechos fundamentales y de les llibertaes públiques, les qu'aprueben los estatutos d'autonomía y el réxime electoral central y les demás previstes na Constitución".

L'autu, que cuenta col votu particular del maxistráu Manuel Aragón Reyes, "avala l'usu del bable per parte de los ciudadanos en cualquier documentu oficial nes sos relaciones cola Alministración autonómica", según informaron fontes del TC nuna nota de prensa.

L'autu del TC señala "la competencia que'l Principáu ostenta en materia de fomentu y protección del asturianu nos sos diverses variantes que, como modalidaes llingüístiques, utilícense nel territoriu asturianu". Asina, recuerda que "nel so artículu cuartu establez la llei que tolos los ciudadanos tienen derechu a emplegar el bable/asturianu y a espresase nél, de palabra y per escrito; y que se va tener por válidu a tolos efectos l'usu del bable/asturianu nes comunicaciones orales o escrites de los ciudadanos col Principáu".

Asina, el TC señala que los estatutos inclúin "un mandatu dirixíu a les correspondientes institucionaes autonómiques de gobiernu pa qu'adopten les midíes necesaries n'orde a asegurar la conocencia d'ambos idiomes y garantizar la so plena igualdá no que se refier a los derechos y deberes llingüísticos de los ciudadanos".

Poro, dexa claro que la impugnada llei de promoción y usu "lléndase a imponer al Principáu la obligación de tramitar los escritos que los ciudadanos dirixan en bable/asturianu". "Asina, la principal virtualidá de la norma consiste en quitar toa discrecionalidá a l'Alministración autonómica p'aceptar les comunicaciones que reciban nesa llingua", señala'l Constitucional. "La validez a tolos efectos alministrativos vendría respondida por pola obligación de tramitar dichos escritos y en particular la reconocencia de la so eficacia pa paralizar el cómputu de los plazos de caducidá o precripción de les acciones en vía alministrativa", acaba la nota del TC.