José Mújica diz que "nun hai vencedores nin vencíos" n'Uruguai y que "el poder ta nel corazón del pueblu"

MONTEVIDEO, 30 de Payares (EUROPA PRESS)

Dempués de que los sondeos a pie d'urna concediéren-y la victoria na segunda vuelta de les elecciones presidenciales celebraes esti domingu n'Uruguai, el candidatu del izquierdista Frente Amplio, José Mújica, aseguró nel so primer discursu que "nun hai vencedores nin vencíos", nel procesu electoral, dao que "la contienda precísalos a toos" y "el poder ta nel corazón del pueblu".

El que será nuevu presidente d'Uruguai realizó un primer discursu d'agradecimientos: a los electores, al so antecesor, Tabaré Vázquez, y al so principal rival nes elecciones, el candidatu del Partido Colorado, Luis Alberto Lacalle.

"Hai d'aquellos que piensen que'l poder ta arriba y nun se dan cuenta que'l poder ta nel corazón de les grandes mases", dixo Mújica, dende'l balcón del hotel NH Colombia de Montevideo. "Sabés una cosa, pueblu, ésti ye'l mundu del revés. Nel estráu teníeis que tar vos y nosotros aplaudiéndote".

"Ganamos pola obra d'esti gobiernu, pola continuidá d'esti gobiernu", señaló en referencia a Vázquez, col que se fundió nun cálidu abrazu frente a los siguidores del so partíu, un xestu tresmitíu polos medios llocales.

"La mio reconocencia Lacalle, a (el candidatu a la vicepresidencia del Partido Colorado, Jorge), Larrañaga, y si en dalgún momentu el mio temperatmentu de combatiente fízose llevar la llingua más p'allá pido discuples", añadió.

MILES DE PERSONES CELEBREN LA SO VICTORIA EN MONTEVIDEO

Decenes de miles de persones celebraron esti domingu nes cais de Montevideo la victoria de Mújica na segunda vuelta de les elecciones presidenciales uruguayes. Portando les típiques banderes de la coalición d'izquierdes Frente Amplio --de color blanco, roxu y azul--, la multitú sintió baxo la lluvia les primeres palabres del que será'l so nuevu presidente.

La rambla de la capital vistióse colos colores del Frente Amplio, en mediu d'un asordecedor festexu de bocines, y cánticos que s'estendía por más d'un kilómetru, informaron los medios llocales. Müjica, ex guerrilleru del Movimientu de Lliberación Nacional-Tupamaros, que pasó más d'una década en prisión pola so llucha armada, asocederá'l 1 de marzu a Vázquez na presidencia.