Les Cofradíes de Pescadores finen güei'l paru y van volver a trabayar esti mediudía

MADRID, 12 de Xunu (EUROPA PRESS)

La Federación Nacional de Cofradíes de Pescadores va finar güei'l paru "puntual" que convocó'l pasáu llunes en señal de protesta pol alza del preciu del gasoleu, colo que la flota de baxura va volver salir a la mar mediudía, informó a Europa Press el presidente de la entidá, Genaro Amigo.

La organización, que representa a 225 organizaciones de pescadores de tol país, adoptó esta decisión nun conceyu estraordinariu de los sos órganos de gobiernu, dempués de que'l secretariu xeneral de la Mar, Juan Carlos Martín Fragueiro, ofreciere al sector pesqueru 19 millones d'euros en conceutu d'ayudes de 'mínimis', ente otres iniciatives, p'amenogar la crisis qu'atraviesa esta actividá.

Les cofradíes valoraron el "gran esfuerzu" realizáu pol departamentu d'Elena Espinosa p'atender les sos reivindicaciones, pero nun-yos abultó bastante'l paquete de midíes propuestu, polo que van siguir negociando col Gobiernu pa tratar de meyorales.

"La flota de bayura --formada por pequeñes embarcaciones-- nun pue siguir más tiempu amarrada proque pierde muncho cada día que nun trabaya", esplicó Amigo, quien sorrayó que la flota d'altura "ye diferente dafechu", en referencia al paru indefiníu convocáu dende'l pasáu 30 de mayu pola patronal Cepesca y la Plataforma en Defensa del Sector Pesqueru.

El presidente de la Federación reconoció que'l paru del sector del tresporte constitúi "otru problema" al que va tener que facer frente la flota artesanal, cuando vuelva entamar la so actividá al entender que pue tener dificultaes pa comercializar los sos productos.

D'otru llau, Amigo señaló que'l sector va siguir negociando coles petroleres Repsol y Cepsa, a les qu'ayeri reclamó qu'estableza un preciu únicu pal suministru de gasoleu pesqueru nos distintos puertos españoles, col oxetivu de "tranquilizar" a la flota de baxura.

Amás d'ayudes por valor de 19 millones, Martín Fragueiro plantegó a los pescadores una rebaxa de la tarifa que s'aplica a los productos frescos nos puertos de titularidá del Estáu y el puxu d'un etiquetáu pal pescáu frescu español, col oxetivu d'estremalu del productu importáu.

Espinosa va entrevistase güei con Cepesca, qu'entamó'l 30 de mayu un paru indefiníu de la flota en señal de protesta pola falta de midíes del Gobiernu pa paliar la crisis qu'atraviesa'l sector pesqueru.