L'escritor Vitu Pintado va tar esti llunes el 'Veranu Lliterariu'

UVIÉU, 20 Ago. (EUROPA PRESS) -

L'actividá de promoción y animacion 'Veranu Lliterariu' de Corvera va cuntar esti llunes 20 d'agostu cola presencia del escritor Vitu Pintado. L'avilesín, maestru d'oficiu, ye ún de los nomes nuevos de la lliteratura infantil n'asturianu y ye coautor de títulos como 'La hestoria de L'Anguleru' o 'L'Anguleru. Suaños de Navidá'.

Vitu Pintado va llegar a Les Vegues pa dar a conocer a los neños de Corvera la so obra 'Un nataliegu perbullindiegu', otra historia que bebe de la tradición navidiega asturiana y na que'l principal protagonista ye'l nataliegu, esto ye, el tueru que se quema dende nuechebona a añu nuevu nes cases asturianes pa llograr protección, pero que nesti casu l'autor presenta con un perfil humanizáu y con mieu al fueu.

'Veranu Lliterariu' ye una actividá de promoción y animación a la llectura de lliteratura infantil n'asturianu, entamada pola Casa de la Llingua-Serviciu de Normalización Llingüística de Corvera, que se realiza na biblioteca de Les Vegues, n'horariu de 11.30 a 12.30 hores.

L'actividá, d'asistencia llibre y gratuita, consiste n'alcuentros ente escritores y tolos neños que quieran asistir. Cada escritor avera y cuenta una de les sos producciones lliteraries a los pequeños, n'alcuentros d'una hora de duración.