El paru dexa en febreru 3.192 desemplegaos más n'Asturies y llega casi a los tres millones y mediu nel Estáu

UVIÉU, 03 de Marzu (EUROPA PRESS)

Demientres el mes de febreru se rexistraron nes oficines d'emplegu asturianes 3.192 nuevos paraos, lo que supón un incrementu del 4,57 por cientu en rellación a xineru del 2008 y eleva la cifra total de desmplegaos a 73.558. La subida ye llixeramente inferior a la de la media nacional, que foi del 4,63 por cientu y que torna en 154.058 paraos más, elevando asina'l desemplegu hasta 3.431.859 persones, la cifra más alta dende l'añu 1996 n'España, según informó güei'l Ministeriu de Trabayu y Inmigración.

Respeuto al mesmu mes del añu anterior, el númberu de paraos creció n'Asturies en 19.187 persones, lo que supón un 35,29 por cientu más, una tasa d'incrementu menos que la media nacional (50,38%).

A nivel nacional, el númberu de paraos s'averó en febreru a los 3,5 millones de desemplegaos, tres sumar 154.058 paraos más sobre xineru (+4,63 por cientu, no que ye la mayor subida nesti mes dientro de la serie histórica).

En concreto, el volume total de paraos algamó al zarru del pasáu mes la cifra de 3.481.959 desemplegaos, el so nivel más altu en tola serie histórica comparable, qu'entama en 1996. L'incrementu mensual de 154.058 paraos, anque eleváu, ye inferior al que s'esperimentó en xineru (+198.838 desmplegaos). En cualquier casu, febreru foi'l quintu mes siguíu nel que'l paru subió penriba de los 100.000 desemplegaos.

Esti aumentu del paru en febreru supón amás la undécima subida mensual siguida del desemplegu, y ye casi tres veces superior al rexistráu n'igual mes del añu pasáu, cuando'l paru s'incrementó en 53.406 persones. Nel últimu añu, un total de 1.166.528 persones pasaron a engordar les llistes del desemplegu, lo que representa un crecimientu interañal del 50,4 por cientu.

POR SECTORES

Del total de paraos asturianos. 33.446 fueron homes y 39.112 muyeres. D'ellos, 8.818 teníen menos de 25 años y 54.740 pertenecíen al grupu de trabayadores con otres edaes. El desemplegu afeutó más a los homes menores de 25 años (5.104 paraos) qu'a les muyeres (3.714).

El sector más castigáu nel mes de febreru n'Asturies foi una vez más el de servicios, que sumó 1.894 paraos hasta algamar los 47.274 desemplegaos. A esti sector síguilu la construcción (+534), la industria (+458) y l'agricultura (+35). Mientres, el conxuntu de persones sin emplegu anterior creció en 271 persones hasta llegar a los 5.563 paraos.

De los 73.558 desemplegaos rexistraos nel Principáu nel mes de febreru, 4.420 fueron estranxeros pertenecientes fundamentalmente a los sectores de servicios (2.248), construcción (1.142), Industria (266) y agricultura (127), y sin emplegu anterior (636).

En cuanto a la contratación, el númberu de contratos tramitaos nel Principáu d'Asturies cayó en 2.836 unidaes hasta asitiase nos 16.432 contratos, lo qeu supón un 14,72 por cientu que'l mes anterior. D'estos, 1.825 fueron indefiníos y 14.607 fueron temporales.