El paru sube n'Asturies en 2.600 persones nel primer trimestre y asitia la tasa nel 8,49%

UVIÉU, 25 d'Abril (EUROPA PRESS)

El paru aumentó nel primer trimestre del añu 2008 nel Principáu d'Asturies en 2.600 persones, lo que supón un aumentu del 6,60% en rellación col trimestre anterior, colo que'l númberu total de desemplegaos asitióse en 41.200 persones, lo que representa una tasa de paru del 8,49%, según los datos de la Encuesta de Población Activa (EPA) fechos públicos güei pol Institutu Nacional d'Estadística (INE).

Con respecto al mesmu trimestre del añu anterior, el desemplegu redúxose n'Asturies en 3.600 persones (-7,99%), mientres que'l númberu d'ocupaos aumentó en 19.400 persones, lo que supón un aumentu del 4,57% en rellación col mesmu trimestre del añu anterior.

De xineru a marzu la cifra d'ocupaos aumentó en 6.800 persones en rellación col peridodu ente ochobre y avientu, lo que supón un aumentu de 1,56% de manera que la cifra total d'ocupaos algama les 444.500 persones.

Por comunidaes autónomes, la tasa de paru n'Asturies asítiase perbaxo de la media (9,63%) y perbaxo de comunidaes como Andalucía (14,83%), Estremadura (14,36%) Comunidá Valenciana (9,61%) Castiella La Mancha (9,57%), Murcia (9,51%).

Por sexos, la tasa de desemplegu femenín dobla tovía n'Asturies la de los varones. Mientres que'l paru ente les muyeres algama una tasa de 11,82 nel casu de los homes ye del 5,79. En númberos absolutos, los homes que busquen u emplegu elévense a 15.500 mientres qu'hai 25.700 muyeres inscrites nes oficines d'emplegu. Per contra, la tasa d'actividá de los homes elévase al 60,25 mientres que la de les muyeres ye del 44,27.

En total na comunidá autónoma 252.400 homes tienen ocupación frente a les 192.000 muyeres.

ANÁLISIS NACIONAL.

A nivel nacional el paru subió en 246.600 persones nel priemr trimestre del añu, el 12,79% en rellación al trimestre anterior, colo qu'el númberu total de desmplegaos asitióse en 2.174.200 y la tasa de paru repuntó más d'un puntu, hasta'l 9,63%, algamando'l so valor más altu en tres años, según los datos de la Encuesta de Población Activa (EPA) fecha güei pública pol Institutu Nacional d'Estadística (INE).

En concreto, la tasa de desemplegu nun algamaba un porcentaxe d'esta naturaleza dende'l primer trimestre del 2005, cuando llegó a asitiase nel 10,29%. El vicepresidente económicu, Pedro Solbes alvirtió de que nos próximos dos años la tasa de paru va movese ente'l 9% y el 10%, el peor de los escenarios. Amás, en términos absolutos, nun se rexistraba un aumentu del paru tal eleváu dende'l primer trimestre de 1993.

Nos últimos doce meses, el paru aumentó en 318.100 desemplegaos (+17,1%), mientres que la ocupación incrementóse en 333.000 persones, asitiándose la tasa interañal de crecimientu del emplegu nel 1,66%, nel peor de los escenarios. Amás, en términos absolutos, nun se rexistraba un aumentu del paru tan eleváu dende'l primer trimestre de 1993.

Nos últimos doce meses, el paru aumentó en 318.1000 desemplegaos (+17,1%) mientre que la ocupación incrementóse en 333.000 persones, asitiándose la tasa interañal de crecimientu del emplegu nel 1,66%, siete décimes menos que nel trimestre anterior (2,38%).

De xineru a marzu destruyéronse 74.600 emplegos (-0,36%) algamando'l númberu total d'ocupaos la cifra de 20.402.300 persones. Sicasí, foi la población española la que se llevó la peor parte, al perder 128.700 puestos de trabayu nel trimestre (-0,7%), frente a la creación de 54.100 emplegos ente los estranxeros (+1,8%).

El Ministeriu d'Economía y Facienda reconoció nun comunicáu que les cifres "nun son bones", pero precisó que la crisis prevista nel crecimientu de la ocupación se-y unió'l "carácter estacional" que suel tener el paru nos primeros trimestre del añu.

Nel primer trimestre, el númberu d'activos subió en 172.000 persones, el 0,77% en rellación al trimestre anterior, quedando constituyida la población activa por 22.576.500 persones. La tasa d'actividá asitióse nel 59,35%, dos décimes más que nel trimestre anterior mientes qu'en términos interañales el volume d'activos creció en 651.100 persones, el 2,97% más.

EL PARU SUBE MÁS ENTE LOS HOMES Y LOS ESPAÑOLES.

Demientres el primer trimestre, el desemplegu aumentó en dambos sexos, anque l'incrementu ente los homes foi llixeramente superior al esperimentáu poles muyeres. D'esta manera, el paru femenín creció en 107.300 muyeres (+10,23%), mientres que'l masculín lo fizo en 139.400 homes (+15,85%). Con estos datos, tanto la tasa de paru masculina como la femenina subieron alredior d'un puntu, hasta asitiase nel 7,87% y el 11,99% respectivamente.

Quitando los datos por nacionalidaes, el paru de los españoles aumentó de xineru a marzu en 149.600 persones (+9,8%) frente a un incrementu de los desemplegaos estranxeros de 97.000 persones (+23,7%). La tasa de paru de los españoles asitióse nel 8,7%, casi seis puntos menos que la de los estranxeros (14,65%), en gran parte debío a que la población inmigrante ye más xoven que la española.

Por edaes, la subida del paru concentróse nel grupu d'ente 25 a 54 años, con 176.400 desemplegaos más que nel trimestre anterior, siguíu de la franxa de 20 a 24 años (44.700 paraos), de los de 55 años y más (+17.800) y de los mozos de 16 a 19 años, onde'l paru incrementóse en 7.700 persones.

LA DESTRUCCIÓN D'EMPLEGU AFECTA MÁS A VARONES Y MOZOS.

De xineru a marzu destruyéronse 73.200 emplegos ocupaos por homes (-0,6%) y 1.500 ocupaos por muyeres (-0,02%). Por edaes, el descensu de la ocupación dexó sentise especialmente na franxa de 20 a 24 años y de 25 a 29 años, al perder, respetivamente, 75.000 y 45.000 nuevos puestos de trabayu. Non en toles franxes d'edá se destruyó emplegu. La que más puestos de trabayu xeneró foi la de 45 a 49 años, con 26.900 ocupaos más y la de 55 años y más, con 25.300 nuevos emplegos.

En cuanto a l'actividá, ésta aumentó en mayor midida ente les muyeres qu'ente los homes. Asina, el númberu d'activos varones creció en 66.200 persones (+0,51%), mientres qu'al finar el mes de marzu un total de 104.800 muyeres más queríen trabayar (+1,11%). D'esta manera, la tasa d'actividá femenina repuntó hasta'l 49,73% y la masculina asitióse nel 69,32%.

L'incrementu de l'actividá rexistráu nel primer trimestre foi mayor ente los estranxeros. Asina, el númberu d'inmigrantes activos aumentó en 151.100 (+4,6%), frente a un crecimientu de l'actividá ente los españoles de 20.900 persone (+0,11%). D'esta manera, la tasa d'actividá de los estranxeros (76,6%) supera con creces a la de los españoles (57,03%) con una diferencia de casi 20 puntos.

La destrucción d'emplegu nel primer trimestre afectó especialmente a los sectores de construcción y servicios. El primeru perdió 73.200 puestos de trabayu (-2,7%) y ya tien 44.400 efectivos menos qu'hai un añu. Nos servicios destruyéronse 77.500 emplegos (-0,5) ente xineru y marzu, anque en términos interañales el sector lleva creaos 371.800 puestos de trabayu.

Nel restu de sectores (agricultra y industria) rexistráronse incrementos de la ocupación, anque nun fueron bastante pa compensar el 'baxón' en construcción y servicios. En concreto la industria foi'l sector que ganó más ocupaos, con 59.400 nuevos emplegos (+1,8%) siguida de l'agricultura, que creó 16.600 emplegos (+1,8%).

En cuanto a la evolución del paru por sectores económicos, construcción y servicios tamién encabezaron los incrementos. Na construcción rexistráronse 71.100 paraos más que nel trimestre anterior (+32.6%), el mayor aumentu porcentual, en tanto que los servicios tuvieron un aumentu de 96.300 desemplegaos (+12,8%).

Nel restu de sectores, menos na agricultura, subió'l paru demientres el primer trimestre. El colectivu de paraos de llarga duración viose engordáu con 41.400 paraos más (+8%), la industra ganó 27.800 desemplegaos (+20,3%) y les persones en busca del so primer emplegu rexistraron un aumentu del paru de 12.200 persones.