La Plataforma escontra la Muria de Cabueñes pide que se depuren responsabilidaes por "irregularidaes" nel plan

XIXÓN, 31 d'Ochobre (EUROPA PRESS)

La Plataforma escontra la Muria de Cabueñes pidió güei que se depuren responsabilidaes poles supuestes "irregularidaes" na tramitación del plan que prevé la construcción de 650 viviendes, según informó al traviés d'una nota prensa tres el conceyu que caltuvieron ayeri col conceyal d'Urbanismu, Pedro Sanjurjo.

La Plataforma y les asociaciones vecinales exixieron la retirada del Plan Parcial por ser "innecesariu, inxustificáu y sumamente perxudicial", dende'l puntu de vista ambiental y estructural, pa la parroquia de Cabueñes, les parroquies llenderes y le conxuntu de la ciudá de Xixón.

Según el colectivu, tres l'estudiu detalláu del espertu ambiental y d'ordenación del territoriu, Ignacio Martínez, nuna bona parte del espediente se "detectó una serie de graves irregularidaes y illegalidaes na so tramitación que lu tornen en nulu de plenu derechu".

Los vecinos afirmaron que nel conceyu, el conceyal d'Urbanismu los unvió a los tribunales, pese a qu'él mesmu "sabe qu'esta vía ye d'imposible accesu hasta que s'apruebe dichu Plan".

Nesti contestu, el colectivu reclamó la depuración de "les responsabilidaes téuniques y polítiques que correspuendan, y la tresparencia de tol procesu, tal y como esperen los ciudadanos nun Estáu de Derechu".

La Plataforma solicitó entrevistes colos representantes de los diferentes partíos políticos con representación municipal (PP y IX) y van solicitar "con urxencia" un alcuentru cola alcaldesa, Paz Fernández Felgueroso, "dada la gravedá de los fechos".

En próximos díes el colectivu va celebrar una asamblea abierta a tolos vecinos de la parroquia, pa informalos con detalle de la situación y decidir los pasos a siguir pola Plataforma y les asociaciones vecinales.