El Principáu caltién contactos con cuatro empreses pa tentar de recolocar a los trabayadores de San Claudio

PP y IX-BA-Verdes reprochen al Gobiernu que se llende a mandar a los despidíos "a la 'ventanilla'"

UVIÉU, 22 d'Abril (EUROPA PRESS)

El conseyeru d'Industria y Emplegu, Graciano Torre, dixo güei que'l so departamentu unvió los currículos de los trabayadores despidíos de Lloza San Claudio a cuatro empreses, cumpliendo asina la moción aprobada pol Parlamentu asturianu en payares pa que l'Executivu realizara les xestiones necesaries dirixíes a la so recolocación. Sicasí, Torre nun facilitó'l nome de les mencionaes empreses "pola discreción necesaria". Amás, dixo que-y consta que "dalguna ufierta foi refugada".

Torre fizo estes manifestaciones nel trescursu de la so declaración na Comisión d'Industria y Emplegu de la Xunta Xeneral del Principáu, onde'l PP entrugó sobre la recolocación de los trabayadores despidíos de la Fábrica de Lloza de San Claudio (Uviéu). Mientres tanto, un grupu de sindicalistes se manifestaron na puerta de la XXPA pa protestar pola situación de los trabayadores despidíos.

El dirixente rexonal dixo que 13 trabayadores ya tán trabayando y que son 23 les persones que queden "ensin colocar". Esplicó que se vino trabayando colos trabayadores nuna doble direición: unviando currículos a les empreses y trabayando colos afectaos con unes tutoríes individualizaes nel Serviciu Públicu d'Emplegu.

Torre espunxo que de les 23 persones que queden ensin colocar, cuatro s'inscribieron nel serviciu públicu d'emplegu de marzu y una ta agora realizando la tutoría. De los 18 restantes, tres tán realizando cursos de formación, cuatro inscritos en cursos, nueve buscando trabayu pola so cuenta y dos tán pendientes del informe del tutor. Asina, según Torre, la conseyería "ta cumpliendo" los alcuerdos sindicales y la resolución de la XXPA.

Agustín Cuervas Mons (PP) mostróse, sin embargu, decepcionáu pola declaración de Torre na cámara. "La realidá ye qu'ustedes nun tuvieron interés n'ayudar a los trabayadores de San Claudio, pasaron de tou, de los trabayadores y de les sos families", comentó.

El diputáu poular añadió que lo único que ficiera'l gobiernu yera "mandar a los trabayadores a la 'ventanilla'" asumiendo un procesu ordinariu pa persones que son despidíes. Cuervas-Mons asguró non pensar que'l Gobiernu nun seya quién de recolocar a los trabayadores. Reprochó a Torre "falta d'interés" nesti asuntu y recordó qu'otres alministraciones, como l'Ayuntamientu d'Uviéu, punxeron "más la carne nel asador" que'l Gobiernu rexonal p'ayudar a los trabayadores despídíos, a pesar de non tener obligación.

Pela so parte, el voceru d'IX-BA-Verdes, Jesús Iglesias recordó a Torre que deberíen algamar resultaos "más eficaces" ante un problema d'estinción colectiva de los puestos de trabayu, como'l de Lloza de San Claudio.

Reprochó a Torre que nun cumpliera la resolución de la XXPA, nel sen d'un "sobreesfuerzu" pa llograr la recolocación. Aludió a que s'algamaron los trámites "ordinarios" que "tien que facer frente cualquier tabayador despidíu". "El cumplimientu de la resolución de la Xunta ye insuficiente y deficitariu", añadió.