El Principáu, CC.OO y UXT refuguen que l'asturianu se valore como méritu nes oposiciones de Cangas del Narcea

UVIÉU, 04 de Marzu (EUROPA PRESS)

La conseyera d'Alministraciones Públiques y Voceru del Executivu asturianu, Ana Rosa Migoya, aseguró güei que la propuesta del Ayuntamientu de Cangas del Narcea de valorar la conocencia de la llingua asturiana nes oposiciones municipales "va a la escontra de la Llei d'Usu y Promoción del Asturianu". Pela so parte, representantes sindicales de la zona vieron la midida "problemática".

Migoya, qu'ofreció una rueda prensa pa dar cuenta de los acuerdos adoptaos nel conseyu de Gobiernu, indicó que l'Alministración rexonal, cuando llegue l'acuerdu plenariu adoptáu pol Ayuntamientu de Cangas del Narcea, van facer llegar esa alvertencia d'illegalidá dende l'ámbitu de l'Alministración Llocal.

Ye la interpretación que fai Migoya de lo que diz l'artículu cuartu de la citada norma: "El Principáu d'Asturies va propiciar el conocimientu del bable/asturianu por tolos emplegaos públicos que desarrollen el so llabor n'Asturies; el conocimientu del bable/asturianu va poder ser valoráu nes oposiciones y concursos convocaos pol Principáu d'Asturies, cuando les característiques del puestu de trabayu y la naturaleza de les funciones que vayan a desarrollase lo requieran".

La conseyera esplicó que la Llei d'Usu y Promoción establez tener en cuenta la conocencia del asturianu nes convocatoriaes de selección de les alministraciones públiques pa los puestos que tengan rellación precisamente cola promoción o espardimientu de la llingua asturiana pero non pal restu.

"Nun se pue xeneralizar esta midida contemplada na Llei d'Usu y Promoción del asturianu a toles convocatories porque la llei ye mui clara", acabó Migoya.

OPOSICIÓN SINDICAL

En declaraciones a la Televisión Pública Asturiana, recoyíes por Europa Press, dos representantes sindicales del sector públicu de la zona de Cangas del Narcea y del suroccidente asturianu mostraron la so oposición a la midida.

En pallabres del miembru d'UXT, "con esta midida lo único que va algamar ye crear munchos problemes al propiu Ayuntamientu y a aquellos trabayadores que puean optar a una plaza". Pal representante de Comisiones Obreres, "pol fechu de falar una llingua nun se pue aumentar la puntuación nuna oposición determinada".

Tanto Comisiones Obreres como UXT apoyen la oficialidá de la llingua asturiana, una opción que, d'aprobase, conllevaría la exixencia (obligatoria y non como méritu) de conocencia d'asturianu pa dellos puestos de l'Alministración.