Los sindicatos piden a Saint Gobain que caltenga los contratos eventuales hasta'l fin d'añu

Les organizaciones soliciten que los emplegaos afeutaos pola parada d'una llinia s'asitien en puestos de nivel asemeyáu

UVIÉU, 09 d'Ochobre (EUROPA PRESS)

Los sindicatos plantegaron güei a la direición de Sekurit --área de Saint Gobian nes instalacioens d'Avilés qu'ellabora productos p'automóvil-- que de facese la parada pal mes de payares d'una de les llinies de fabricación se caltengan hasta final d'añu los 16 contratos eventuales existentes, que s'asitie otra vuelta a los emplegaos en puestos de nivel profesional asemeyáu y qu'amás s'aproveche pa dar formación a los mesmos.

Según esplicaron fontes sindicales a Europa Press la propuesta de la direición de la multinacionales Saint Gobain de parar el mes de payares una de les llinies de fabricación de Sekurit col oxetivu de "reducir capacidá de producción", ye la única que pue "responder a la situación actual del mercáu".

Nun pasa lo mesmo con otres de les midíes que plantega la compañía, como la de la direición del ARDC, el centru d'Investigación y Desarrollu, que propón tamién la reducción de 20 emplegos, de los 76 totales del centru, según fontes sindicales. Los representantes de los trabayadores alertaron tamién de la intención de la compañía de desarrollar una "reorganización" na zona de lloxística de la llinia de Glass.

Según fontes sindicales nun se pue inorar la situación del sector del automóvil y de la construcción, que son precisamente los dos a los que ta lligada l'actividá de la planta de La Maruca, n'Avilés.

"Nun se pue escaecer que les noticies sobre dambos sectores nun son positives, asina que lo que tratamos de llograr ye qu'afeute na menor midida posible a los trabayadores. Evidentemente somos conscientes de que si aumenta la demanda l'emplegu crez y si baxa l'emplegu vese en dalguna manera afeutáu", destacaron los sindicatos.

Agora les centrales tán pendientes de que la compañía-yos dea una respuesta sobre los sos pidimientos, dalgo que va pasar "probablemente" la próxima selmana.