TPA va emitir 'Port', el primer programa conxuntu de les televisiones intercéltices

UVIÉU/SANTIAGO DE COMPOSTELA, 31 May. (EUROPA PRESS) -

Galicia acueye estos díes la grabación del primer programa de les televisiones de tol ámbitu intercélticu. Trátase de 'Port', un viaxe musical al traviés de la música del Arcu Atlánticu y que nos próximos díes grabara un capítulu dedicáu a Asturies. La TPA va emitir esti espaciu nel últimu trimestre del añu.

'Port' emitióse mentes trés temporaes n'Escocia y Irlanda y que nesta cuarta edición, frutu de la collaboración ente les diverses televisiones rexonales europees, da'l saltu a Bretaña, Asturies y Galicia al traviés de la TVG.

La fórmula del programa consiste en que dos conocíes cantantes y multi-instrumentistes de música celta, la escocesa Julie Fowlis y la irlandesa Muireann Nic Amhlaoibh, percuerren dellos llugares pa conocer la tradición musical de cada sitiu. Amás, aprovechen pa interpretar pieces xunto con músicos locales, faciendo fusión de temes y estilos.

Na grabación de 'Port' en Galicia van intervenir el grupu Leilía y los músicos Ángel Lorenzo, Begoña Riobó, Xabier Díaz, Susana Seivane, Xosé Liz de Cena y Uxía Senlle. La productora del proyectu, la escocesa Bees Nees, escoyó trés localizaciones na redolada de Santiago de Compostela: el palaciu de San Lourenzo, la Casa das Crechas y la Casa Grande de Cornide. L'equipu del programa va viaxar de siguío a Asturies, onde van grabar nos próximos díes.

Ta previstu qu'esta serie musical, que se compón de seis episodios d'una hora de duración, va ser emitida a partir del últimu trimestre del añu na canal irlandesa TG4, na escocesa BBC Alba, na TPA d'Asturies y na Televisión de Galicia