La Xunta de Personal Docente pide la retirada del ficheru onde van recoyese datos sobre la evolución del profesoráu

UVIÉU, 18 de Payares (EUROPA PRESS)

La Xunta de Personal Docente non Universitariu d'Asturies fizo públicu güei un comunicáu nel que pide la retirada de la resolución de la Conseyería d'Alministraciones Públiques que prevé la creación del ficheru automatizáu onde van constar datos relativos a la evaluación del profesoráu, incluyendo les baxes por incapacidá llaboral.

La Xunta yá refugó con anterioridá la Resolución del 20 de xunu del 2008 pola que se dicten instrucciones pa la execución del modelu de 'Siguimientu de l'actividá profesional na Alministración del Profesional na Alministración del Principáu d'Asturies, los sos Organismos y Entes Públicos' al nun negociase colos representantes del profesoráu.

La Xunta diz tener "series dudes" sobre la custodia y la utilización de los datos que se prentenden rexistrar en dichu ficheru y poro exixe la "retirada darréu" de la resolución y la convocatoria "darréu y urxente" de la mesa sectorial d'educación pa negociar tolo relativo a les condiciones llaborales del profesoráu.

Amás, la Xunta encamentó tanto al Ministeriu d'Educación como a la Conseyería a convocar "urxentemente" el concursu de tresllaos y a negociar tolo relativo a vacantes y plantiyes n'Asturies. Otres exixencies fueron la de negociar la reducción d'horariu llectivu pa mayores de 55 años y les gratificaciones por xubilación anticipada, asina como la del pagu de trienios a tol profesoráu interín al que s'audeuda.

La situación de la enseñanza del asturianu y del currículum d'infantil tamién foi oxetu de resolución aprobada por unanimidá.