La Xunta pola Defensa de la Llingua acusa a la "aristocracia provinciana" del PSOE de dir "'contracorriente'"

UVIÉU, 20 de Mayu (EUROPA PRESS)

La Xunta pola Defensa de la Llingua Asturiana acusó güei a la "aristocracia provinciana del PSOE" de dir 'contracorriente', en materia de derechos llingüísticos, señalando que "los políticos d'otros territorios apoyaron unánimemente la oficialidá de les sos llingües" mientres n'Asturies "negaron estos derechos en cuenta de reconocelos".

Al traviés d'una nota prensa, la Xunta respondía d'esta manera a les últimes declaraciones del secretariu xeneral de la Federación Socialista Asturiana, Jesús Gutiérrez, nes que, según la Xunta, "dicía que yera capaz de poner en peligru la estabilidá del Gobiernu autonómicu con tal de negar la oficialidá de la llingua".

Pa la organización, "ye un fechu gravísmu qu'un cargu de la FSA declare qu'asume la futura inestabilidá del Gobiernu asturianu con tal de non contemplar la oficialidá". Desde'l so puntu de vista, "la non oficialidá trai como consecuencia la desapaición de la llingua a mediu plazu, fechu sociolóxicu que ye de consensu dientro y fuera d'Asturies ente los especialistes".

Amás, entiende que "N'Asturies tán negándose derechos fundamentales universales, amás de los que la Constitución Española reconoz a les llingues propies, y los asturianos y asturianes tán sufriendo l'agraviu comparativu col restu de los ciudadanos del Estáu".

"Por cuenta d'unos intereses y prexuicios políticos primarios, esti representante de la FSA va formar parte de la llista de xente que va tener l'honor tan dudosu de ser responsable de la desapaición de la nuestra llingua", señala'l testu. "Trenta años d'esa 'promoción' que tanto defiende yá demostraron que nun valieron pa frenar el procesu de sustitución llingüística", añadió.

Por esi motivu, la Xunta exixe un "refugu a les declaraciones gravísimes del secretariu xeneral del FSA, onde s'interpreten los últimos resultaos electorales como una especie de referéndum sobre la oficialidá, inorando tolos estudios sociolóxicos que dexen claro que la mayoría de la población ve con bonos güeyos la oficialidá".