Xuristes denuncien discriminación na baremación de les publicaciones en llingua asturiana nes oposiciones de maestru

UVIEÚ, 14 de Xunetu (EUROPA PRESS)

L'Aconceyamientu de Xuristes pol Asturianu denunció güei públicamente lo qu'entienden que ye una "discriminación" a la llingua asturiana nos criterios de baremación de los trabayos publicaos, establecíos nes oposiciones a maestru d'enseñanza primaria, que tán teniendo llugar estos díes. Concretamente, señalaron que los trabayos nesti idioma puntúensen hasta un máximu de 0,15 puntos, frente a los 0,35 que s'apliquen a los documentos escritos en cualquier otra llingua.

Al traviés d'un comunicáu, el colectivu esplicó que "na fase de concursu, pa les publicaciones rellacionaes cola especialidá a la qu'opta l'aspirante (apartáu 3.2.1 del bloque III), aplíquense hasta 0,35 puntos, y pa les publicaciones sobre otra especialidá a la qu'opta l'aspirante (apartáu 3.2.2 del bloque III), hasta 0,15 puntos". Sin embargu, "nel momentu de xustificar les puntuaciones provisionales de los opositores l'Institutu Asturianu d'Alministración Pública 'Adolfo Posada', ensin apoyu llegal acuerda que les publicaciones n'asturianu, aunque seyan de la especialidá, se baremen pel apartáu 3.2.2", ye dicir, con un máximu de 0,15 puntos.

En conclusión, "les publicaciones rellacionaes cola especialidá feches en cualquier idioma del mundu (vivu o muertu) puen algamar hasta 0,35 puntos nel concursu pal accesu al Cuerpu de Maestros del Principáu d'Asturies, pero si la llingua emplegada foi la propia del país, l'asturiana, entós la puntuación másima posible ye de 0,15 puntos", señaló'l comunicáu.

L'Aconceyamientu considera esta "discriminación, arriendes d'inconstitucional, antiestatutaria, provocadora y faltona". y "nun tien sofitu nes bases del concursu-oposición". Poro, el colectivu ofreció asesoramientu xurídicu a los opositores pa que recurran la resolución del Institutu Adolfo Posada. También pidió a los sindicatos d'enseñanza "qu'exixan les esplicaciones del casu a la conseyera d'Alministraciones Públiques y vocera del Gobiernu, Ana Rosa Migoya, responsable cabera d'esta sangrina discriminación".