O 54,5% dos fogares galegos recorreu en 2008 á sanidade privada e desembolsou unha media de 916,4 euros

Os fogares galegos con membros cursando estudios superiores gastan unha media de 3.750,8 euros ao ano

SANTIAGO DE COMPOSTELA, 20 Abr. (EUROPA PRESS) -

O 54,5 por cento dos fogares galegos recorreu dalgunha forma en 2008 ao pagamento de bens e servizos sanitarios privados, e gastou, de media, 916,4 euros, segundo datos da Enquisa de condicións de vida das familias realizada polo Instituto Galego de Estatística (IGE).

O gasto máis frecuente, dentro dos sanitarios, é o recurso a consultas médicas fóra da sanidade pública, que utilizaron en 2008 o 32,4 por cento dos fogares galegos. Este é tamén, en termos anuais, o concepto menos custoso dentro dos bens e servizos médicos, cun custo medio de 395,2 euros en 2008.

Case tan frecuente, e empregado por un 31,4 por cento dos fogares, é a compra de bens sanitarios, como prótese, lentes ou audiófonos, segundo consta no estudio. Neste concepto, os fogares desembolsaron 428,2 euros de media. Así mesmo, un 11,8 por cento dos fogares recorreu a servizos médicos privados, cun desembolso por termo medio de 1.356,6 euros.

Ademais, o 8 por cento dos fogares galegos recorreu a seguros médicos privados, que teñen, na Comunidade galega, un custo medio de 959,4 euros anuais.

Por outra banda, as rendas altas recorren máis a servizos sanitarios privados e realizan un desembolso maior. Así, mentres nos fogares con ingresos inferiores ou iguais a 1.000 euros mensuais só optan pola sanidade privada no 34,8 por cento dos casos, cun importe medio anual de 577 euros, naqueles que perciben máis de 4.000 euros mensuais a porcentaxe ascende ao 77,1 por cento e o gasto medio a 1.500 euros anuais.

EDUCACIÓN

Segundo o IGE, tres de cada dez fogares galegos realizan algún gasto en educación, un ámbito ao que dedican 1.943 euros anuais de media. A cifra aumenta no 8,7 por cento dos fogares que destinan parte da súa capital a financiar estudios superiores: dedican 3.750 euros/año a este concepto.

O importe ascende a 3.303,5 euros por alumno, dos que a educación leva 2.364 se o estudante ten que custearse este concepto. Pola súa banda, o gasto medio en educación non superior descende ata os 1.083,3 euros anuais, e o gasto por estudante foi de 794,6 euros.

En canto á concorrencia aos diversos tipos de centro, o 72,2 por cento dos fogares galegos só gasta en centros públicos, o 21,8 por cento faino en concertados e o 3,4 por cento en privados. O 2,6 restante ten gastos en centros de varias titularidades.

ECONOMÍA

O 52,3 por cento dos fogares galegos manifestou os entrevistadores do IGE que os gastos mensuais (pagamento de hipoteca ou de aluguer, auga, luz e comunidade, devolución de empréstitos) supoñen "unha carga pesada". O 43,9 opina que constitúen unha "carga razoable" e só o 3,8 por cento cre que os gastos mensuais non son unha carga apreciable. De media, o custo mensual da auga corrente nun fogar galego é de 15 euros e o da electricidade, de 40.

En canto á morosidade, o 96,6 por cento dos fogares galegos non declarou atrasos no pagamento de ningún recibo. O 6,3 por cento dos que teñen aluguer, non obstante, admiten atrasarse no pagamento do arrendo.

En relación a outro tipo de gasto, o IGE recolle que o 13,4 por cento dos fogares galegos realizaron achegas a organizacións non gobernamentais (ONGs), por un valor medio ao termo do ano de 205,3 euros; o 9,6 por cento compraron produtos ecolóxicos; e o seis por cento, produtos de comercio xusto.