AGE pregunta a Feijóo por que vai ser "un hooligan da privatización" se o novo copagamento suporá "un escaso aforro"

Adxudicar a alta tecnoloxía do Sergas a unha empresa significará que "se impoñan os intereses económicos", sostén

SANTIAGO DE COMPOSTELA, 1 Oct. (EUROPA PRESS) -

A vicevoceiro de Alternativa Galega de Esquerda (AGE), Yolanda Díaz, preguntou ao presidente da Xunta, Alberto Núñez Feijóo, por que "decide aplicar" o novo copagamento, que afecta pacientes crónicos ou graves na dispensa da farmacia hospitalaria, se admitiu "un escaso aforro" derivado desta medida.

"Feijóo é un auténtico hooligan da privatización", aseverou a tamén coordinadora nacional de Esquerda Unida (EU) nunha rolda de prensa no Parlamento de Galicia na que rexeitou o "ataque claro e directo" que o novo copagamento supón, ao seu xuízo, para a saúde dos cidadáns. Neste sentido, advertiu de que terá "consecuencias severas" sobre os enfermos.

Núñez Feijóo, criticou Díaz, "cunha man" di que o aforro para as arcas públicas será "francamente escasísimo" pero "coa outra" afirma que a aplicación "vai ser férrea". "Vai ser un hooligan obediente", concluíu.

Así, Yolanda Díaz reprobou a "contumacia" do líder dos populares galegos e insistiu "nos efectos perversos" que esta decisión terá sobre a saúde pública. Pero, segundo lamentou, "forma parte do seu imaxinario político" e, con iso, "están a facer ideoloxía".

A "GRANDE ESTAFA" DE "PRIVATIZAR" A ALTA TECNOLOXÍA

Xunto a a vicevoceira de Alternativa compareceron as deputadas Eva Solla e Consuelo Martínez. A primeira, para denunciar o concurso polo cal a Xunta adxudicará a unha empresa privada a alta tecnoloxía do Sergas, o que, na súa opinión, significará que "se impoñan os intereses económicos" sobre os científicos.

En concreto, Solla referiuse á contratación "dunha solución global que cubra as necesidades de realización de probas e procedemento de diagnóstico por imaxe, intervencionismo, medicina nuclear e radioterapia no servizo galego de saúde", tal e como figura na plataforma de contratos de Galicia.

O importe da devandita concesión, que indicou que será para oito anos, supera os 88 millóns e a data límite de presentación de ofertas está fixada para o próximo venres 11 de outubro. Para a parlamentaria de AGE, este "novo concurso" equivale a "unha privatización" máis e, en suma, "unha grande estafa", posto que terá "consecuencias" para a saúde e para o peto dos galegos.

Ao respecto, alertou de que en centros hospitalarios en que a alta tecnoloxía xa está "semiprivatizada" se constata "un exceso" no número de probas necesarias para o paciente que cifrou no 25%. Eva Solla vinculou este feito co "negocio" e "os beneficios" que levará consigo para unha determinada compañía explotar este servizo, á marxe do conveniente para os enfermos.

Ademais, fronte a isto, asegurou que a renovación da maquinaria lle custaría ao Sergas uns 50 millóns de euros, e os aparatos "serían da súa propiedade", co que podería prevalecer o interese dos profesionais en aspectos relacionados coa investigación. "É un novo desprezo á sanidade pública", censurou, ao sinalar que os médicos "non foron consultados".

"O TALLER OFICIAL E O TALLER DE MANOLO"

Por último, a deputada Consuelo Martínez ironizou con que o PP "entende a sanidade como un taller" e afirmou que, na súa opinión, o que trata de establecer é "un taller oficial", pola sanidade privada, "para os que lla poidan pagar"; e outro "taller de Manolo", no que se utilizará material "de despece" e o cal identificou coa sanidade pública.

Martínez acusou o Partido Popular de buscar facer "un grande negocio" baseándose na saúde e aos enfermos, e acusou este extremo de "crime contra a humanidade". "É algo moi serio", incidiu.

Así mesmo, subliñou que as políticas "de austericidio" dos populares "matan aos máis pobres, matan aos máis débiles, matan aos enfermos e matan os máis anciáns".

É "un escándalo", segundo denunciou, que o Goberno do PP tanto en Madrid coma en Galicia "aplique recortes" nesta materia mentres incrementa nun 27% o que van cobrar os partidos", algo que relacionou con que "ao PP se lle remataron os sobres".