CIG-Ensino pide á Xunta que todas as clases sexan en galego para conseguir a "supervivencia" do idioma

O sindicato esixe a derrogación da Lomce por supoñer "unha volta á españolización"

SANTIAGO DE COMPOSTELA, 20 Ene. (EUROPA PRESS) -

A CIG demandou á Xunta que implante a totalidade das aulas en galego. Con esta medida pretende que se consiga unha "total" inmersión lingüística, para que a lingua galega alcance a "supervivencia" na nosa comunidade e "teña un futuro".

Así o indicaron Anxo Louzao, secretario nacional da CIG-ensino, e Marta Dacosta, membro da Executiva, nunha rolda de prensa este martes, na que fixeron balance da situación de "retroceso" do galego no ámbito do ensino e propuxeron numerosas actuacións para solucionar a mesma.

Deste modo, Anxo Louzao mostrou a súa preocupación en canto á perda de galego falantes nas xeracións novas, posto que, segundo os últimos datos do IGE, o 75 por cento dos menores de 15 anos "non falan nunca galego". "Vemos que o noso idioma está en perigo", manifestou.

Para el esta situación "dramática" ten unha relación "directa" coa política lingüística levada a cabo polo Goberno do PP en Galicia durante os últimos 30 anos, a cal se "intensificou" dende o ano 2009. "O Goberno ten vontade de destruír o noso idioma", reprendeu.

CRÍTICAS Á XUNTA

En primeiro lugar, Louzao acusou á Xunta de levar a cabo "unha política de exterminio". Ademais, censurou a súa "actitude contra natura" en canto á lingua, posto que para el unha das "razóns de ser" do Executivo autonómico é "potenciar a normalización lingüística" e "garantir" o galego.

Así, sinalou o PP como o "inimigo máis grande" do idioma e culpouno de "destruír" en Galicia calquera diferenza con respecto a España. Para Louzao, o Goberno galego está a inculcar "o engano" e "a mentira" na comunidade.

"Aos que queremos exercer como galegos énos inviable e imposible", sentenciou o sindicalista. Ao respecto, explicou que "non hai unha opción de liberdade de elección" e que o galego "continúa" nunha situación de debilidade con respecto ao castelán --diglosia--.

Así mesmo, Louzao puntualizou que a lingua galega continúa nun proceso de "colonización" por parte do castelán dende hai cinco séculos. Deste modo, reprochou ao Goberno galego que, durante estes anos, "cribara" e "eliminara" todo aquilo que fortalecera e potenciou o idioma.

"ABERRACIÓN"

Pola súa banda, Marta Dacosta fixo unha selección das medidas en contra do galego que, ao seu entender, activou o Executivo de Alberto Núñez Feijóo dende que tomou as rendas da Xunta en 2009.

En concreto, criticou que Feijóo, "nada máis acceder ao poder", eliminase "de forma urxente" a obrigatoriedade da proba en galego que se esixía ás persoas que optasen a unha praza pública. Unha medida que, advertiu, "non veu soa".

De feito, apuntou que no mes de maio, o Executivo autonómico eliminou o requisito da presentación dos proxectos en lingua galega nos concursos nos que pode participar o profesorado na consellería de Educación e as axudas ás aulas de infantil que impartían a docencia en galego -- solicitadas polos pais -- .

Tamén criticou que no mes de xullo comezou o "desmantelamento" das 'galescolas' e que en setembro comezaron os "recortes" aos equipos de normalización lingüística.

Por outra banda, relatou que, en 2010, o Goberno autonómico "prohibiu" impartir matemáticas, física e química e bioloxía en galego, feito catalogado como "aberración" por Marta Dacosta, ao tempo que recalcou que a Administración investiu entre cinco e sete millóns de euros en libros en castelán destas materias.

En canto ao plan de normalización, subliñou que se iniciou un proceso de "acoso" e "derrubamento" en contra dos membros do equipo de plan de normalización, así como o 'decreto plurilingüe', o cal "impón" o inglés para "reducir" o galego.

SOLUCIÓNS "INMEDIATAS"

Por todo iso, propuxeron un "cambio na política lingüística" que garanta ao galego os dereitos de calquera lingua nun país normalizado.

Louzao censurou que a actual Constitución Española no seu artigo 3.1. "non lle outorgue os mesmos dereitos ao español que ao galego", posto que establece que o primeiro sexa coñecido e usado e o último solo empregado.

Neste sentido, esixiu á Xunta a derrogación "inmediata" do decreto do plurilingüismo no ensino e cumprir o Plan Xeral de Normalización Lingüística, aprobada dende hai 11 anos no Parlamento. "O mesmo PP esqueceu el e goberna en contra dos seus principios", xulgou Louzao.

Así, indicou que o plan recollía que, como mínimo, a metade das aulas tiñan que ser impartidas en galego --tamén as de infantil-- , así como as matemáticas tiñan que explicarse neste idioma. Por iso, lamentouse de que actualmente un neno pode ter contacto co inglés "antes" que co galego.

Outra das medidas que lle demandan á Xunta para acabar coa situación de "inferioridade" do idioma e alcanzar a "plena" normalización lingüística é a tamén derrogación da Lomce, cualificada como "unha volta á españolización".

MÁIS MEDIDAS

Tamén apostou por un plan plurianual de formación do profesorado, para que este colectivo "tome conciencia" da situación e teña unha "predisposición" a ensinar en galego.

Louzao esixiu ao Goberno galego que se volvan instaurar as probas de galego das persoas que acceden a unha praza pública, así como que proporcione materiais complementarios en lingua galega, en referencia aos 'cadernos de verán', que empregan os nenos en verán para repasar os coñecementos adquiridos durante o curso.

Por outra parte, demanda que, como mínimo, se imparta o 50 por cento das clases en galego e en educación infantil, aínda que subliñou que "non conseguirán a normalización plena" ata que se "galleguicen" os currículos e impártanse a totalidade das aulas en lingua galega. De non ser así, dixo, "non se alcanzará a total inmersión lingüística".

Finalmente, recordou que CIG-ensino participará na manifestación organizada pola plataforma Queremos galego! e convocada para o 8 de febreiro ás 12,00 horas. En referencia á plataforma, Louzao manifestou o seu "total apoio" ao informe referente ao galego que presentará A Mesa en Xenebra (Suíza) este xoves.