O FROB di aos afectados por preferentes que traballa nunha solución, pero sen prazos

Os titulares de produtos híbridos consideran "unha nova traizón" que o PP votase contra cambiar a lei para non aplicar quitas

   SANTIAGO DE COMPOSTELA, 9 Abr. (EUROPA PRESS) -

   O director xeral do Fondo de Reestruturación Ordenada Bancaria (FROB), Antonio Carrascosa, trasladou aos representantes da Coordinadora Galega de Afectados polas Preferentes e subordinadas que continúa traballando nunha solución para que poidan recuperar o seu diñeiro, se ben foi "moi prudente" e non concretou cantidades, prazos ou número de persoas.

   Así o explicou o representante da plataforma de Compostela, Xesús Domínguez, que acudiu ao encontro, celebrado en Madrid. Carrascosa, explicou, dirixiuse aos afectados con "moita prudencia" e "boas palabras".

   Existe, indicou Domínguez, a posibilidade de que Banesco, o comprador de NCG Banco, "poña unha cantidade de diñeiro indeterminada" para resolver o problema cando se materialice a compra e pase a ter o control efectivo da entidade galega.

   Ademais, engadiu, o FROB conta con 324 millóns de euros de provisión para facer fronte a devolucións por sentenzas firmes contra preferentes (o acordo de venda, de feito, indica que cubrirá o 85% dos gastos que o comprador de NCG teña que asumir por este motivo).

   Tamén se podería completar a cantidade "cunha partida presupostaria do Estado", que tería que ser aprobada polo Consello de Ministros, para alcanzar o 100% do diñeiro de aforradores atrapado nestes produtos complexos, sinalou Domínguez.

   Os representantes dos afectados expuxeron a súa situación a Carrascosa, ao que pediron "a bicicleta enteira, non só unha roda". É necesario, defendeu Domínguez, identificar os investidores profesionais que adquiriron preferentes e facer que o resto, que son aforradores, "queden á marxe".

   O "positivo" do encontro, dixo, é que Carrascosa recibira os afectados, o que "mellora con moito a plana do Goberno galego".

"NOVA TRAIZÓN"

   Ademais, o voceiro dos preferentistas referiuse tamén ao voto negativo do PP na Comisión de Economía do Congreso a unha iniciativa que pedía modificar a lexislación estatal para impedir que se apliquen quitas aos aforradores atrapados en preferentes.

   "Foi un papelón do PP, lamentable, é unha nova traizón aos cidadáns e aos afectados", protestou e pediu ao Congreso que avale a proposta e que se resolva "por decreto o problema xerado por decreto".