El Principáu rexistra en xunetu 1.453 paraos menos que'l mes anterior

La contratación aumenta un 14,82 por cientu con respecto al mes anterior y un 4,52% na tasa interanual.

UVIÉU, 2 d'Agostu (EUROPA PRESS)

El númberu de paraos rexistraos nes oficines d'emplegu amenorgó un 3,13 por cientu nel mes de xunetu nel Principáu d'Asturies, que ye asina una de les comunidaes autónomes con mayor recorte de desemplegu con respecto al mes anteior. Según los datos espardíos güei pol Ministeriu de Trabayu, a finales de xunetu había na rexón 44.911 paraos, 1.457 menos qu'en xunu, lo que supón un descensu del desemplegu del 3,13 por cientu.

Con estos datos y, salvando los casos de la ciudá autónoma de Melilla, onde'l paru baxó un 12,56%, Cantabria con una baxada del 3,91% y Castiella y Llión, con un descensu del 3,28%, Asturies foi la comunidá con mayor descensu del desemplegu en xunetu, en contraste amás con un aumentu del paru nel conxuntu del país, del 0,23 por cientu.

La progresión na comunidá ye inferior en relación a xunetu del 2006, con un descensu de 3.538 paraos nos últimos doce meses y una reducción porcentual del desemplegu del 7,30 por cientu. Nesti casu, la cayida del paru asturianu na tasa interanual ye la mayor del país, per delantre de Galicia (-5,45%), País Vascu (-5,36%) y Melilla (-4.22%).

De los 44.911 paraos inscritos nes oficines d'emplegu asturianes al zarru del mes de xunetu, la mayor parte, 29.528, concentrábense nel sector servicios que ye'l qu'agrupa la cifra más elevada de desemplegaos na rexón. Per detrás asítiense la industria, con 5.371 paraos, nel mesmu númberu que'l colectivu que nun tien emplegu anterior, la construcción (4.142) y la d'agricultura (499).

En relación al mes de xunu el paru baxó en tolos sectores, menos na construcción, onde s'incrementó en 14 persones. El mayor descensu en términos absolutos correspondió a los servicios, con 874 paraos menos, siguíu del colectivu ensin emplegu anterior (352 paraos menos que'n xunu), la industria (201 paraos menos) y l'agricultura (40 paraos menos).

Les muyeres siguien siendo les más afectaes pol desemplegu na rexón asturiana con un total de 28.089 inscrites nes oficines d'emplegu, frente a 16.822 varones. Por edaes, los paraos menores de 25 años yeren a finales de xunetu 4.603 (2.268 homes y 2.335 muyeres), mientres los mayores de dicha edá sumaben 40.308 desemplegaos (14.554 varones frente a 25.754 muyeres).