Aprobada la Llei de la Rede Autonómica d'Escueles Infantiles, con 41 de los 45 escaños de la Xunta Xeneral

UVIÉU 13 Nov. (EUROPA PRESS) -

El plenu de la Xunta Xeneral aprobó esti miércoles la Llei de la Rede Autonómica d'Escueles Infantiles de 0 a 3 años col respaldu de la gran mayoría de la cámara que suponen los 41 escaños de PSOE, PP, IX-Convocatoria y Grupu Mistu, menos los cuatro votos en contra de Vox.

La Cámara dio asina lluz verde al dictame de la Comisión d'Educación sobre'l proyectu de llei que regula la estensión de la rede y la integración na mesma de les escueles infantiles municipales.

La diputada del Grupu Mistu, Covadonga Tomé, incidió na so intervención na "allegría" de llograr esta regulación demandada bien de tiempu. "Dende'l rigor científicu, el grau de salú, intelixencia y prosperidá na edá adulta dependen en gran midida de lo que pasa nos máxicos primeros mil díes de vida", dixo.

Coles mesmes, argumentó que'l "cerebru del lactante precisa cultivase y les ferramientes afayadices permiten qu'algame'l máximu de les sos potencialidaes". "Según l'informe PISA, que tanto interesa dacuando y otres veces non, los alumnos y alumnes de 15 años que cursaron polo menos un añu n'educación infantil llogren meyores resultaos académicos y la meyor visión", dixo.

Igualmente, remarcó que "la diferencia ye especialmente significativa ente l'alumnáu socialmente desfavorecío, porque la educación de 0 a 3 años tien la capacidá de neutralizar les diferencies sociales y culturales que tienden a reproducise a lo llargo de la vida escolar". "Falamos, por eso, d'equidá. La educación ye la ferramienta más poderosa pa lluchar contra la probeza, les desigualdaes y cualesquier otra forma de discriminación dende la edá más temprana", sostién.

Per otru llau, el diputáu del Grupu Mistu-Foru, Adrián Pumares, incidió en que'l "votu en contra a esti proyectu de llei namás pue esplicase dende'l desconocimientu".

Valora Pumares qu'esta norma va permitir que los conceyos nun asuman "por fin" esa competencia "que-yos yera impropia dafechu" al constituyise esta rede como "una parte más del sistema educativu" de competencia autonómica. Amás, resaltó los beneficios de la educación 0 a 3 "nel desarrollu de les habilidaes cognitives; nel desarrollu d'otres habilidaes non cognitives, como pue ser la socialización o la disciplina; y tamién nel desarrollu de les competencies básiques d'aprendizaxe y nel amenorgamientu de la tasa d'abandonu escolar".

Pal diputáu del Grupu Mistu-Foru, tamién ye significativu que la llei va ameyorar con enmiendes en beneficiu de les condiciones llaborales del personal, polo que da'l so respaldu al proyectu por entendelo "necesario". "Ye una noticia bona pal Principáu d'Asturies", afirma.

Dende IX-Convocatoria por Asturies, el so portavoz Xabel Vegas valoró tanto'l valir educativu como de conciliación que va suponer la rede autonómica de 0 a 3 años, amás de les garantíes llaborales pal personal. Coles mesmes, aprovechó pa pidir el respaldu de la Cámara a los presupuestos de 2025 que permiten asegurar los recursos necesarios pal so desarrollu.

El diputáu de Vox Javier Jové, per otru llau, repitió les sos crítiques al proyectu, al empar que mostró la so esmolición pol futuru de "les guarderíes privaes, que van vese obligaes al zarru". Amás, criticó al PP el so respaldu a la llei: "La DANA revelónos lo que son: la nada. La nada ideolóxica y la nada en xestión; la nada". Tamién incidió en que'l PSOE de la etapa de Javier Fernández consideraba "inasumible presupuestariamente" el proyectu y agora "cuesta cuatro veces más".

Igualmente, mostró'l rechazu de Vox al valor educativu de la etapa de 0 a 3 años. "Vaya babayería. De verdá. Pero ¿qué educación van dar a neños de seis, ocho, diez, doce o catorce meses? Yo soi padre de trés fíos, por dios. Si pasen la metá del día durmiendo. Lo que pasa ye qu'ustedes llamen educación a cualquier cosa", opinó.

Per otru llau, la diputada del PP Gloria García díxo-y que "la etapa 0-3 ye una etapa educativa". "El cerebru d'un neñu desque naz hasta los trés años ye una esponxa: adquier más conocencies un neñu en trés años de los que, por exemplu, tien usté educación en cuarenta y picu", díxo-y ente aplausos d'una parte grande del hemiciclu.

Amás, Gloria García recordó que la primer iniciativa sobre la rede autonómica presentóla'l PP hai años. Asina, argumentó'l respaldu del PP a la llei "por responsabilidá y porque ye necesario un soporte llegal". "Anuncíamoslo nel so momentu y vamos votar que sí a esta llei. Pero tamién avisu, vamos tar bien sollertes al desarrollu normativu posterior", alvirtió.

Finalmente, la diputada del PSOE Mónica Ronderos destacó'l trabayu propositivu de los grupos qu'apoyen el proyectu y de los servicios de la Cámara. "Supimos ponenos d'alcuerdu en beneficiu de tola sociedá asturiana. Quédome cola satisfacción de tar formando parte d'un momentu históricu pa la educación de la nuestra comunidá autónoma. Asturies ye pionera n'establecer una rede económica d'escueles infantiles pal primer ciclu d'educación infantil. ¡Qué allegría ye tar del llau bonu d'esti momentu históricu!", dixo.