UVIÉU, 24 Sep. (EUROPA PRESS) - El presidente del Principáu, el socialista Adrián Barbón, aprovechó'l so discursu nel Debate d'Orientación Política pa pidir dexar atrás el desalcuerdu sobre l'asturianu y el gallego-asturianu, polo que reclamó y pidió "encarecidamente al PP que suelte les sos amarres cola estrema derecha".
"Nun puen dir de la mano colos que nieguen la mesma existencia de dambes llingües, dos envidiables ayalgues culturales. Faigo esti llamamientu enantes de qu'esti parllamentu debata la toma en consideración, espero qu'esti mesmu períodu de sesiones, de la propuesta sobre la oficialidá", dixo Barbón, que destacó que tamos énte la oportunidá de superar les diferencies y xuntase nun consensu que salvaguarde la supervivencia del asturianu y el gallego-asturianu.
"Pregunto cuánto tiempu va haber que siguir aguardando hasta qu'asumamos que son patrimonios compartíos, non emblemes ideolóxicos", dixo Barbón.
Na so intervención, Barbón tamién volvió apellar al arguyu d'identidá, indixebrable del arguyu cultural, de l'autoestima colectiva y del apreciu de lo propio, dalgo que considera "fundamental" pa una comunidá que ta recuperando la confianza nes sos fuerces.
Por eso, indicó que'l so Gobiernu concede una relevancia grande a la posibilidá de que la cultura sidrera sía declarada patrimoniu inmaterial de la humanidá esti mesmu añu, na xunta prevista pola Unesco n'avientu.
L'empiezu de l'ampliación del Muséu de Belles Artes, el términu de la restauración de la cúpula de La Llaboral o la conmemoración del milenariu del monesteriu de Corniana foron otres de les cuestiones pa defender la xestión cultural d'esti exerciciu.
En materia deportiva, Adrián Barbón indicó que'l gobiernu va siguir reforciando'l so apoyu presupuestariu l'añu viniente, nel que va acutar un millón pa les federaciones.
Andalucía
