UVIÉU, 19 Ene. (EUROPA PRESS) -
El presidente del Principáu, el socialista Adrián Barbón, reclamó al PP que "mire un poquitín más a los sos compañeros de Galicia" y "tome nota" de la so postura sobre la oficialidá de la llingua propia.
En declaraciones a los medios en Cuaña, onde se celebró'l Conseyu de Gobiernu selmanal, Barbón posicionóse nel debate llingüísticu n'Asturies depués de qu'esti xueves el presidente del PP rexonal, Álvaro Queipo, tendiera la mano al PSOE pa pactar una reforma de la Llei d'Usu del Asturianu.
Queipo, qu'insistió na postura de los 'populares' contra la oficialidá del asturianu y del gallego-asturianu, indicólo asina en realizando la primer visita d'un presidente del PP asturianu a la sede de l'Academia de la Llingua Asturiana, dalgo que foi calificáu de "históricu" pola institución.
Nesi sentíu, énte esto, Barbón llamó a los 'populares' a "reflexonar" sobre la so posición contra la oficialidá cuando "a pocos quilómetros d'equí, el PP de Galicia lleve a gala reivindicar la defensa de la so llingua y reconocela como oficial".
El presidente recordó que na comunidá vecina, la defensa de la oficialidá de la llingua propia ye "dalgo común" de tolos partíos parllamentarios, yá sía'l PP, el PSdeG o'l BNG.
"Sicasí, equí tán zarraos nuna posición numantina de non a la oficialidá de les llingües d'Asturies", indicó Barbón, que reclamó al PP d'Asturies "que miren un poquitín más a los sos compañeros de Galicia y tomen bona nota d'esto".
Andalucía
