Barbón ve "histórica" la firma de la Llei de la Rede Autonómica d'Escueles 0 a 3 porque "marca un enantes y un depués"

"Nenguna comunidá tien una rede autonómica pública, gratuita y con vocación d'universalidá", dixo, destacando'l trabayu d'Educación, de la FACC y de los grupos que votaron la norma

UVIÉU, 15 Nov. (EUROPA PRESS) -

El presidente del Principáu d'Asturies, Adrián Barbón, calificó de "histórica" la firma la Llei del Principáu d'Asturies pola que s'establez la Rede Autonómica d'Escueles Infantiles de 0 a 3 años, regúlase la so estensión y la integración voluntaria de les escueles infantiles municipales.

Pal xefe del Executivu autonómicu, trátase d'una llei "trescendental na historia d'Asturies" porque "marca un enantes y un depués". Barbón asevera que, igual que nel so día foi relevante la incorporación al sistema educativu del segundu ciclu d'Educación Infantil, dende los 3 años, la integración de la etapa de 0 a 3 años permite "facela algamadiza pa toles persones", siendo consciente de que "la educación ye l'ascensor social".

Nel despachu del presidente Belarmino Tomás como espaciu "más solemne" del palaciu de Presidencia, Barbón firmó la llei en presencia de la conseyera d'Educación, Lydia Espina; la directora xeneral de Centros, Rede 0-3 y Enseñances Profesionales, Cristina Blanco; la presidenta de la Federación Asturiana de Conceyos (FACC), Cecilia Pérez; y representantes de les families.

"Ye un día especial porque acabo de firmar la llei pola que se crea la rede de les escuelines y s'abre la vía pa integrar eses cuasi 80 escueles municipales de 0 a 3 qu'existen güei día", remarcó.

Según señaló en declaraciones a los medios, colos presupuestos del 2024 llogróse "una conquista histórica que foi la gratuidá de 0 a 3 años en tola rede" y agora naz la rede autonómica. "Hai 31 escueles que vamos abrir nós nesta primer fase", recordó, añadiendo qu'en 2025 va principiar el procesu d'incorporación de les 76 escueles municipales.

"Nenguna comunidá tien una rede autonómica pública, gratuita y con vocación d'universalidá", dixo, destacando'l trabayu del equipu d'Educación, amás del compromisu de la FACC y de los grupos parllamentarios que votaron la norma.

Nesi sentíu, insistió na necesidá de disponer de presupuestos en 2025 p'avanzar nel so desarrollu. "Nun val con firmar la llei. Quier dicise, precisamos qu'haya incorporación de recursos nel 2025, 2026 y 2027", argumenta.

Amás, reseñó que'l proyectu de presupuestos pal añu que vien incorpora la gratuidá de les matrícules universitaries pal alumnáu de families de clase media y trabayadora. Asina, el presidente destaca que con estes midíes les families asturianes de clase media o clase trabayadora "van tener una educación pública de calidá dende los 0 años hasta qu'acaben los estudios universitarios".

"Esti día ye, ensin dulda, ún de los díes pa min más prestosos, más felices como presidente. Dígolo daveres porque creo que tamos énte un pasu alantre fundamental. Y porque nun hai comparación. Nenguna comunidá autónoma tien esta rede autonómica. Nun la creo nenguna. Hai otres fórmules, distintes, mistes, pero una rede autónoma pública, gratuita y con vocación d'universalidá, que ye lo que vamos facer nos años vinientes, pues lóxicamente esto nun lo tien naide", afirmó.