Cangas del Narcea acueye esti domingu la primer semifinal del Premiu Autonómicu de Canción Asturiana

UVIÉU 8 Nov. (EUROPA PRESS) -

La Conseyería de Cultura, Política Llingüística y Deporte creó'l Premiu Obdulia Álvarez La Busdonga d'Asturianada, una reconocencia destinada a promover y difundir la canción asturiana, una de les manifestaciones culturales más significatives de la comunidá autónoma que se declaró Bien d'Interés Cultural de calter inmaterial nel 2015.

El concursu va desenvolvese en dos fases. La primera va consistir nes semifinales, que van ser el domingu, 10 de payares, en Cangas del Narcea; el vienres, 15 de payares, en La Pola Siero; y el vienres, 22 de payares, en La Felguera. La gran final va celebrase'l vienres 29 de payares nel Teatru de la Llaboral, en Xixón.

Con esti premiu nuevu, Cultura busca reconocer y valorar la tradición tan rica de l'asturianada y el llabor d'aquelles persones que caltienen viva esta forma d'arte. La creación del Premiu Obdulia Álvarez, amás de la calidá musical, tamién busca fomentar l'usu de la llingua asturiana, promoviendo la so normalización y espardimientu al traviés de la música.

Como requisitu, les persones participantes nesti certame de creación nueva van tener que quedar clasificaes nos seis primeros puestos de los concursos locales establecíos que s'entamen pela xeografía asturiana a lo llargo del añu. Tocante a les categoríes, estableciéronse trés: la masculina, la femenina y la moza, esta postrera empobinada a intérpretes menores de 22 años.

D'esta forma, el xuráu va evaluar el desempeñu de les persones cantantes teniendo en cuenta los criterios que s'especifiquen nes bases que güei se publicaron nel Boletín Oficial del Principáu d'Asturies (Bopa). Estos son la conducta y actitú escénica, la entonación y afinación, la calidá d'emisión y dicción vocal, la ornamentación y matización; la dificultá y variedá d'estilos y la calidá llingüística.

En premios, la Conseyería de Cultura destinó una suma de 15.000 euros repartíos en 6.000 euros pa la categoría masculina, 6.000 euros pa la categoría femenina y 3.000 euros pa la categoría moza. La creación d'esti gallardón supón un pasu significativu pa la valoración y difusión de l'asturianada, convidando a tola ciudadanía a celebrar y caltener esti patrimoniu cultural inmaterial que nos axunta.

L'ASTURIANADA Y LA BUSDONGA

L'asturianada foi parte fundamental de la cultura asturiana dende va sieglos y valió como vehículu de tresmisión oral de les tradiciones, vezos y el paisaxe de la nuestra comunidá. La so práctica axunta dellos elementos culturales y humanos que la convierten nun símbolu d'identidá y cohesión qu'axunta y vertebra a la sociedá asturiana.

La Conseyería de Cultura, Política Llingüística y Deporte escoyó la figura d'Obdulia Álvarez Díaz, más conocida como La Busdonga, pa dar nome a esti certame de música asturiana cola mira de reivindicar la trayectoria d'una muyer que na primer metá del sieglu XX impúnxose a los estereotipos de la dómina y foi quién a destacar pol so talentu musical.

La voz de La Busdonga enriba de los escenarios asturianos metióse rápido nes cases d'Asturies gracies a esi talentu vocal que güei sigue inspirando a munches intérpretes d'asturianada.