CCOO denuncia que'l Principáu incumple la Llei d'Usu al haber alumnos que nun van poder estudiar asturianu

UVIÉU 10 Sep. (EUROPA PRESS) -

CCOO denunció que la dotación de personal docente nun respuende nin a los pidimientos de los centros nin a la matrícula rexistrada en 'Llingua y lliteratua asturiana', polo que va haber alumnos que nun van poder dar l'asignatura, "lo que supón un incumplimientu de la Llei d'Usu".

Según señaló'l sindicatu, la contratación de profesoráu d'asturianu ye "insuficiente" pa satisfacer les necesidaes de los centros educativos y a la matrícula rexistrada ente xunu y setiembre, polo qu'hai una parte del alumnáu que solicitó estudiar l'asignatura que nun va poder facelo.

Una situación que según el sindicatu "supón un incumplimientu de la Llei d'Usu y Protección del Asturianu, "que garantiza l'aprendizax d'esta llingua na enseñanza reglada". Nesi sentíu, espliquen qu'hai 12 institutos onde solicitaron profesores d'asturianu a xornada completa pa poder cubrir la demanda, pero onde Educación namás concedió media plaza.

Una situación que pa CCOO "ye la consecuencia d'una previsión deficiente y de l'aplicación de criterios d'aforru nes contrataciones" y que, según denuncien, tamién se repite en Primaria. Un ciclu onde tamién "hai grupo que superaben la ratio máxima establecida pola llei, una práctica que respuende tamién a la intención d'axustar los contratos a medies xornaes".

Por eso, CCOO denunció la "precariedá llaboral" del colectivu de profesores d'asturianu y que más del 80% de les places en Primaria y el 95% en Secundaria sían a media xornada.