El centru loxísticu d'Amazon n'Asturies yá tien un millar d'empleaos

UVIÉU 14 Nov. (EUROPA PRESS) -

El centru loxísticu qu'Amazon tien nel polígonu industrial de Bobes, nel conceyu de Siero, yá tien un millar d'empleaos, según confirmaron responsables de la compañía. La cifra supón más del doble que los 400 que tenía nel mes de setiembre, cuando empezó a funcionar.

Amás, los 1.000 empleaos fixos de la planta asturiana nun inclúin los refuercios de personal que puedan incluyise en campañes como'l Black Friday o la de Navidá.

Los responsables d'Amazon celebren el ritmu de contrataciones, porque la previsión yera algamar en trés años los 1.5000 trabayadores. Nun se refuga que pueda superase esa cifra. El 44% de los trabayadores actuales son muyeres y más de la metá son d'Asturies.

Otra de la cuestiones que llama l'atención nel centru loxísticu de Amazon asturianu ye la mocedá de los sos trabayadores. La media ye de 36 años, too eso robotizao y col acentu na seguridá llaboral y na sostenibilidá en tol procesu de recepción, empaquetáu y unvíos.

El centru loxísticu tien 175.000 metros cuadraos de superficie total, con 40.000 metros cuadraos d'área robotizada. Existen más de sesenta roles distintos de trabayadores, dende especialistes en tecnoloxía de la información, personal d'inxeniería y robótica a posiciones n'equipos qu'escueyen, empaqueten y manden los pidíos a los veceros

Amás, yá son más de 200 les pymes d'Asturies qu'operen n'Amazon. Según la multinacional, les esportaciones de les pymes asturianes al traviés d'Amazon supera los 25 millones d'euros. La multinacional tien más de 25.000 empleaos n'España, onde tien 40 centros d'operaciones.

El complexu inclúi tecnoloxíes como clasificadores d'artículos, desplazadores de palés y vehículos de guiáu automáticu, que dan soporte a los empleaos nes sos funciones.

OVD1

El centru de Siero conozse como OVD1. Amazon denomina a los sos centros loxísticos en función de les sigles correspondientes al aeropuertu más cercanu.

Amazon invirtió 300 millones d'euros nel complexu, que se sumen a los 13.000 millones d'euros nes sos operaciones n'España. Cola tecnoloxía busquen eliminar la necesidá de tresportar cargues pesaes y amenorgar xeres repetitives, lo que permite que les persones se centren nel tipu de trabayu que los robots nun puen realizar, señalen dende la multinacional.

Asturies convirtióse nun puntu estratéxicu pa les operaciones d'Amazon. Asina, el centru loxísticu xunióse a la estación loxística actual d'Amazon en Meres.