Colectivos ambientalistas y animalistas critiquen al Gobiernu asturianu por recuperar les matances de llobos

   UVIÉU, 21 Mar. (EUROPA PRESS) -

   Formaciones ambientalistas y animalistas asturianes emitieron esti vienres una nota de prensa na que s'amuesen críticos col Gobiernu asturianu dempués de qu'anunciara la recuperación de controles poblacionales del llobu, despues de que'l Congresu de los Diputaos aprobase rebaxar la protección d'esa especie.

   "Paez que'l Gobiernu Asturianu, con una celeridad que yá quixéramos ver pa otros asuntos, tien priesa por recuperar nuevamente les matances del llobu y pretende convocar el Comité Consultivu del Llobu, qu'anuncia para'l 10 d'abril. Sicasí, nun paez tener tanta priesa por tomar midíes lexislatives o por escorrer a quien tolos años prinden fueu al monte y ponen en peligru les vides humanes al empar que provoquen graves daños ambientales", criticaron.

   Los colectivos ambientalistas y animalistas amuesen la so "total disconformidá" colo aprobao nel Congresu y a afirmen que la pretensión del gobiernu del Principáu de volver matar llobos ye "inasumible".

   "Aportunamos en que ye necesaria una xestión de los problemes causaos pol llobu totalmente distinta, acorde cola conocencia científica disponible. Reclamamos igualmente un xiru radical escontra la racionalidá para aplicar una xestión responsable col caltenimientu de la biodiversidá", señalaron. Espliquen que'l llobu ye una especie en recuperación.

   "Lamentablemente el gobiernu asturianu aportuna empecinadamente na errónea estratexa de matar llobos y fai de menos les midíes preventives. Cuanto más tiempu se prolongue una estratexa asturiana basada en matar llobos en llugar d'en midíes preventives, va haber más daños al ganáu y mayor malestar social, siendo daqué fácilmente correxible", alverten.

   La nota ta suscrita por Coordinadora Ecoloxistad'Asturies, Colectivu Ecoloxista d'Avilés, Prolobos Asturies, Movimiento Liberación Animal Asturies, Asociación Ereba, Ecoloxía y Patrimoniu, Asociación Medioambiental Ecos Ástures, Coordinadora Ornitoloxicad'Asturies, Institutu para la Calidá y l'Educación Ambiental, Grupu Naturalista Mavea, Plataforma para la Defensa de la Coordillera Cantabrica, SOS Cuideiru, Fridays For Future Asturies, Asociación Nacional d'Animales con Derechos, Asociación Medioambiental la Cirigueña, Teachers for future Spain, Ecoloxistes n'Aición y Asociación Asturiana d'Amigos de la Naturaleza.