La convocatoria pa reclamar midíes contra la crisis climática va ser en Xixón esti domingu

UVIÉU 15 Nov. (EUROPA PRESS) -

Asturies pol Clima entamó pa esti domingu a les 12.00 hores, con salida de los Xardinos del Náuticu, una concentración y cadena humana pa reclamar a los distintos gobiernos midíes pa facer frente a la crisis climática.

La movilización, que tien calter estatal, coincide col alcuentru del clima que se celebra del 11 al 22 de payares en Bakú, n'Azerbaixán, y nel contestu d'emerxencia climática marcáu pola DANA.

Dende Asturies pol Clima, Sixto Armán, destacó la necesidá de "xenerar conciencia sobre los debates fundamentales qu'hai nesti alcuentru climáticu, que pasen por si los países del norte, los que más contaminaron, asumen la responsabilidá histórica y ayuden a consiguir una transición ecolóxica y social xusta con apoyu financieru suficiente a los países del sur".

"Dineru hai si dexamos el gastu militar, si dexamos de financiar a les grandes empreses de la enerxía fósil, hai dineru y más que de sobra pa consiguir que'l conxuntu del planeta encare la emerxencia climática", señaló.

Per otru llau, el catedráticu de Xeoloxía xubiláu, Ricardo Anadón, denunció que dellos informes lleven alvirtiendo dende hai décades que'l clima diba llegar a esta situación, pero "pasaron bien de tiempu ensin tomar midíes o, si se tomaron, foron mui escases".

Nesi sentíu, recordó que, frente a la previsión de llegar a 2050 con emisiones cero, "cada añu siguen disparándose", polo que la temperatura sigue xubiendo "y esi ye un camín que va llevar a la humanidá a situaciones catastrófiques, non namás pola riada, sinón porque prácticamente toles actividaes na tierra van tener que modificase porque la temperatura, la pluviosidá, va modificase".