Cultura entama la segunda muestra sectorial d'artes escéniques Escena en Rede del 22 al 24 d'ochobre

UVIÉU 8 Oct. (EUROPA PRESS) -

La Conseyería de Cultura, Política Llingüística y Deporte presentó esti martes el programa de la segunda edición d'Escena en Rede, la muestra sectorial d'artes escéniques que se va celebrar del 22 al 24 d'ochobre en Llaboral Ciudá de la Cultura.

Cultura tamién anunció qu'abrió'l plazu pa inscribise nes actividaes profesionales d'Asturies ProEscena, ún de los espacios enmarcaos dientro d'Escena en Rede. La inscripción hai que la facer al traviés del formulariu disponible na web escenaenrede.asturiesculturaenrede.es primero del 17 d'ochobre a les 12.00 hores.

Con Escena en Rede, la Conseyería de Cultura quier crear un sitiu d'alcuentru profesional y comercial pa compañíes y profesionales asturianos, amás de facilitar la comunicación, cooperación y intercambéu ente artistes, programadores y instituciones de la rexón. De la mesma manera, Escena en Rede val pa dinamizar el sector cultural, xenerando momentos pal debate y la reflexón y potenciando estilos y llinguaxes nuevos de creación.

El Teatru, el Paraninfu, les Cocines Vieyes, les sales 1, 2 y 3 de La Llaboral y el Teatru Alejandro Casona de la ESAD van acoyer les actividaes programaes nesta edición, qu'incluye producciones de La Westia Producciones; Dana Raz; Higiénico Papel Teatro; Factoría Norte; Camarión; É Vero Teatro; Teatro del Norte; Guayominí; Luz, Micro y Punto; Arlequina y La Líquida; Yheppa Títeres; Con Alevosía Teatro; Nun Tris, y Saltantes Teatro.

Na presentación d'Escena en Rede, al director xeneral d'Acción Cultural y Normalización Llingüística, Antón García, acompañólu'l presidente de l'Asociación d'Empreses d'Artes Escéniques d'Asturies (EscenAsturias), Luis Alija.

N'Asturies ProEscena programáronse los talleres '10 claves para desarrollar con éxito un proyecto escénico', al cargu de Gustavo del Río, coordinador de Galicia Escena Pro, y 'Más allá de la programación de danza. Participación y mediación', que va impartir la xestora cultural Margarida Troguet.

Al tiempu, les y los profesionales del sector van poder participar de trés sesiones de debate sobre les artes escéniques, el territoriu, l'I+D+I y el marcu llexislativu. Y dos sesiones onde los creadores van poder mostrar los sos proyectos a programadores, distribuidores y otros profesionales qu'asistan a la muestra, completen les actividaes pa públicu profesional.

Amás, n'Escena en Rede tamién van poder vese espectáculos ufiertaos por compañíes asturianes, abiertos tanto al públicu profesional como a lo xeneral, con aforu limitáu. Proyectos de teatru, danza o títeres, en castellanu o asturianu, van representase en sales de La Llaboral, tanto nos interiores como nos esteriores y con propuestes pa tolos públicos.

Les invitaciones disponibles pa cada espectáculu van poder retirase a partir del día 18 d'ochobre na Llaboral, en Xixón, nel Centru d'Información Turística del Principáu (CITPA) n'Uviéu, nel Centru Niemeyer n'Avilés, vía telefónica nel 952 076 262, n'unientradas.es y na web de la muestra.