UVIÉU, 27 Jun. (EUROPA PRESS) -
La Conseyería de Cultura, Política Llingüística y Deporte concedió 75.074,83 euros n’ayudes a proyectos y actuaciones arqueolóxiques que se van desenvolver en 15 conceyos de la xeografía asturiana.
Con esta llinia de subvenciones, el Gobiernu d’Asturies impulsa la realización de trabayos arqueolóxicos sobre bienes del patrimoniu cultural asturianu que van ayudar a ampliar el conocimientu sobre estos enclaves.
Ente los proyectos escoyíos nesta convocatoria a los que Cultura otorgó subvención atópense intervenciones arqueolóxiques nel castru d’El Chao Samartín (Grandas de Salime), El Palaciu (Ayande), la rodiada del Camín Real de la Mesa; el xacimientu de La Estaca/Andayón (Les Regueres); El Picu Castiellu de La Mortera (La Ribera); la cueva de Les Pedroses (Ribeseya); el castru d’Antrialgo (Piloña), Lucus Asturum (Llanera) y la sima de Zaraméu (Teberga).
La Conseyería de Cultura tamién concedió ayudes por valor de 30.240 euros a instituciones investigadores cola mesma finalidá d’ayudar al conocimientu de los bienes del patrimoniu cultural asturianu.
Ye’l casu de la Universidá d’Uviéu p’actuaciones nel xacimientu de Vigaña (Balmonte de Miranda); al Conseyu Superior d’Investigaciones Científiques (CSIC) pa estudios en La Campa Torres (Xixón); a la Universidá de Santiago de Compostela pa trabayos en delles cueves asturianes asitiaes n’El Valle Baju de Peñamellera y Llanes; a la Universidá Complutense de Madrid pa llabores d’investigación na cueva de Los Azules (Cangues d’Onís) y a l’Asociación La Ponte pa estudios sobre l’arqueoloxía del campesináu nel Camín Real de la Mesa.
La concesión de les ayudes mentaes publicóse nel Boletín Oficial del Principáu d’Asturies (BOPA) esta mesma selmana baxo’l réxime de concurrencia competitiva.
Ente les actuaciones subvencionables contémplense les actuaciones rellacionaes con escavaciones arqueolóxiques, nel subsuelu o subacuátiques; les prospecciones arqueolóxiques; los muestreos arqueolóxicos; los análisis arqueolóxicos d’estructures emerxentes; los estudios d’arte rupestre; los estudios y tratamientu de materiales arqueolóxicos recuperaos nes escavaciones; amás de los llabores imprescindibles de protección y afianzamientu.
Andalucía
