Cultura llanza una convocatoria nueva de residencies escéniques en Llaboral

UVIÉU 12 Nov. (EUROPA PRESS) -

La Conseyería de Cultura, Política Llingüística y Deporte convocó una edición nueva del programa de Residencies en Llaboral Ciudá de la Cultura. Ta empobináu a les compañíes profesionales asturianes del sector de les artes escéniques y va desenvolvese nel primer semestre del 2025.

Les solicitúes pa participar d'esta iniciativa pueden realizase hasta'l 10 d'avientu. D'esta vez, van concedese un máximu de seis residencies, con ayudes económiques d'ente 1.000 y 4.000 euros por proyectu.

Cada residencia va tener una duración máxima de cuatro selmanes, disponiendo a lo llargo de 21 díes de les sales d'ensayu y d'ente 3 y 5 díes del espaciu escénicu del Teatru de la Llaboral. La compañía va cuntar amás col apoyu del personal técnico y auxiliar del equipamientu públicu.

Esti programa de Residencies enmárcase na actividá del Centru de Recursos Escénicos del Principáu d'Asturies, un proyectu con sede na Llaboral impulsáu pola Conseyería de Cultura cola mira d'apoyar el procesu de desenvolvimientu de les propuestes escéniques de les compañíes, apurriendo recursos materiales y humanos del Teatru de la Llaboral pa la concepción, creación y puesta n'escena de la obra. Con esta midida, el Gobiernu d'Asturies avanza nel apoyu de les industries culturales asturianes, amás de na so profesionalización.

Les bases del programa de Residencies pueden consultase na web www.laboralciudaddelacultura.com. Esti añu, disfrutaron del programa doce grupos profesionales: Guayominí Producciones, Ambigú Media, É Vero Teatro, Manekineko, Susana Gudín, Emilio Méndez Martínez, Julieta de Verano, ACAR Teatro del Mundo, El Jaleo Producciones, Mono Escena, Proyecto Piloto y Factoría Norte.