Cultura va crear en 2025 una llinia d'ayudes al audiovisual n'asturianu y otra pa difusión de la cultura tradicional

La 'Xira Didáctiva' va llevar la industria cultural asturiana a les escueles

UVIÉU, 11 Dic. (EUROPA PRESS) -

La Conseyería de Cultura, Política Llingüística y Deporte va aumentar nel 2025 la partida p'actividaes d'asociaciones y fundaciones que promueven l'usu del asturianu, que pasa de los 50.000 euros del presupuestu de 2024 a los 200.000, dotándose dos llinies nueves, una pa proyectos audiovisuales promovíos por asociaciones o particulares, y otra de 100.000 euros p'actividaes rellacionaes cola difusión de la cultura tradicional

Dientro de les ayudes específiques pa Normalización Llingüística de la Conseyería de Cultura ye reseñable l'aumentu de casi un 5% a los Servicios de Normalización Llingüística. Aumenta igualmente'l presupuestu destináu a los circuitos d'Asturies Cultura en Rede cuasi un 30%, acercándose al millón y mediu d'euros.

Per otru llau, amás de les 1.000 actividades que se programen cada añu a través d'esti programa, l'añu viniente van sumase les de la Xira Didáctica, que va acercar la cultura fecha polos distintos sectores a los escolinos.

Dende Cultura recuerden que les ayudes en concurrencia competitiva son p'actividaes en castellanu, asturianu o gallego-asturianu, pero que l'usu de les llingües propies siempre tien dalgún puntu específicu nos criterios de valoración.

Hai tamién una partida de 200.000 euros pa collaborar col Conceyu d'Uviéu pa les actividaes que desenvuelva a lo llargo del añu que vien alredor del plan pa qu'Uviéu sía Capital Europea de la Cultura en 2031, nun proyectu nel que se quier incluyir al restu de la comunidá.

Ye nueva tamién la partida presupuestaria, de 70.000 euros, nominativa, pa SODECO, p'apoyar el so llaboratoriu FILMLAB Lac6. Amás, hai una ayuda pa l'Asociación de Galeríes d'Arte Contemporáneu d'Asturies pa la muestra EntreArte y pa otres actividaes. L'ayuda a la Semana Negra xube un 46,56 %, el Festival de Cine de Xixón cuenta con 95.000 euros y la Fundación Ópera d'Uviéu alcanza los 250.000 euros.

VA CREASE UN SISTEMA ASTURIANU D'ARCHIVOS

En materia archivística, van destinar 625.589 euros al Archivu Históricu d'Asturies pa la realización de meyores nel so edificiu históricu, no que yera la cárcel correccional d'Uviéu, o pa siguir colos sos llabores d'organización y descripción de fondos, amás de pa la implementación d'un plan nuevu d'archivos municipales y de recuperación d'archivos particulares, a los qu'en xunto se destinen más de 130.000 euros.

Tamién se dobla l'ayuda al archivu del monesteriu de San Pelayo y va siguise col procesu d'ellaboración d'una llei específica en materia d'archivos, que va crear el sistema asturianu d'archivos.

No que tien que ver coles biblioteques, a lo llargo del 2025 va encarase'l procesu de tramitación formal énte la Xunta Xeneral de la llei nueva de biblioteques. Per otru llau, destínense 346.650 euros a la Biblioteca d'Asturies, que va siguir cola so llinia d'esposiciones temporales y d'adquisición de bienes del patrimoniu bibliográficu de la comunidá, de la que se van intensificar los procesos de dixitalización de la so colección.

La Biblioteca Xovellanos va recibir 157.980 euros y la rede de biblioteques municipales va tener 150.000 euros pa l'adquisición de llibros por elles.

Otra manera, el Muséu de Belles Artes d'Asturies ve incrementada l'aportación del Principáu nun 8,02%, llegando a los 2.174.000 euros, a los que se sumen los más de 6 millones d'euros que dende Turismu y con fondos europeos tán destinándose al proyectu d'ampliación de la pinacoteca.

Caltiénense les aportaciones a Llaboral Centru d'Arte y al Centru Cultural Niemeyer d'Avilés, al empar que s'incrementen les que reciben el Muséu Marítimu d'Asturies y el Muséu del Oriente d'Asturies, embarcaos anguaño nos sos procesos de renovación y reforciamientu de les sos actividaes.

Nesti ámbitu de les instituciones culturales, p'acabar, aumenten un 7% l'aportación al Real Institutu d'Estudios Asturianos, que llega a los 341.155 euros.