Cultura va escoyer horros destacaos pa declaralos como BIC

Los bolos pasen de 8.000 a 35.000 euros y va inventariase'l patrimoniu vinculáu a les dances, la mina, les mazcaraes y la sidra

UVIÉU, 11 Dic. (EUROPA PRESS) -

La Conseyería de Cultura, Política Llingüística y Deporte va escoyer horros destacaos pa declaralos como Bien d'Interés Cultural, amás d'afianzar el bancu de pieces pa usalu na restauración, qu'executamos en collaboración cola Asociación del Horru Asturianu y la Fundación Cetemas.

Pal 2025, según se recueye nel proyectu de presupuestos del Principáu, Cultura va destinar 450.000 euros a la restauración d'horros, paneres y cabazos, introduciendo amás dos novedaes significatives nel réxime de xestión d'estes ayudes: la primera d'elles tien que ver cola ampliación del plazu d'execución de les intervenciones, que va pasar a ser d'un añu dende la comunicación de la concesión de l'ayuda, y la segunda tien que ver col pagu anticipáu de les cantidaes que pon el Principáu.

Siguiendo nel ámbitu de les subvenciones, depués de l'aprobación recién de les bases de la so convocatoria, nel 2025 va realizase la primer convocatoria específica pa intervenciones en bienes etnográficos en brañes y mayaes d'Asturies, al empar que se caltienen la llinia d'ayudes en materia de restauración de bienes culturales protexíos o pa bienes de titularidá municipal.

Per otru llau, aumenten les ayudes pa proyectos de difusión y promoción de patrimoniu cultural material y inmaterial, a realizar por asociaciones y empreses, que llega a una cifra de 130.000 euros y que va facer posible que s'executen actuaciones pa garantizar una implicación social mayor na preservación y valorización del nuestru patrimoniu.

Nesti sentíu, caltiénse l'ayuda de 30.000 euros a la Federación Asturiana d'Asociaciones d'Amigos del Camín de Santiago, pa siguir revitalizando esta ruta histórica declarada Patrimoniu Mundial, qu'ente'l 2024 y el 2025 ta beneficiándose d'inversiones importantes, millonaries, procedentes de fondos europeos en materia de turismu, pa cuestiones como la dixitalización d'albergues de pelegrinos, la meyora de l'accesibilidá de la ruta o la corrección de puntos negros nel so percorríu.

Nel ámbitu del patrimoniu inmaterial, la Conseyería cuenta trabayar na protección y difusión de les dances asturianes asina como de les mazcaraes d'iviernu, de la cultura minera, y de la cultura sidrera asturiana. Por eso, van trabayar tanto nes manifestaciones artístiques d'esta cultura, como na difusión del patrimoniu llingüísticu que la caracteriza, asina como nel patrimoniu material que van empezar a inventariar y catalogar pa poder apoyar posteriormente.

En cuantes a la Dirección Xeneral d'Actividá Física y Deporte, el deporte tradicional tien en xunto 30.000 euros. A esto hai qu'añadir una partida específica pa los bolos, que pasa de los 8.000 a los 35.000 euros, colos que se pretende ayudar a meyorar les competiciones y afianzar el deporte más tradicional de la nuestra comunidá, amás de promocionase y da-y visibilidá.