Detectada n'Avilés, Xixón y San Xuan una potencial especie invasora nueva

UVIÉU 11 Dic. (EUROPA PRESS) -

La planaria Postentorogonia Orbicularis, una especie exótica nativa del Oceanu Pacíficu, atopáronla nel Puertu d'Avilés, en San Xuan y nel Puertu Deportivu de Xixón.

Nun estudiu publicáu nel mes d'agostu, investigadores de la Universidá d'Uviéu y del Serviciu Rexonal d'Investigación y Desarrollu Agroalimentariu (Serida) señalen que ye la primer vez qu'apaez esta especie n'Europa.

La Postenterogonia orbicularis ye un viérbene planu (planaria) de color marrón escuru pela parte dorsal y más claru pela parte ventral. Esta especie representa una plaga nel so llugar d'orixe, onde se recoyeron perdes en plantes d'acuicultura asociaes a esti animal. N'Asturies, ta asociáu a moxones y a orca, tanto en mediu portuariu como naturalizáu.

L'investigador predoctoral del Departamentu de Bioloxía d'Organismos y Sistemes de la Universidá d'Uviéu, Ricardo López, apunta qu'esta especie representa una "amenaza seria" pa los ecosistemes locales y la industria acuícola, "especialmente pa los cultivos de bivalvos como moxones y orca, poque ye un depredador voraz d'estos moluscos".

Los autores del trabayu apunten amás qu'esti descubrimientu destaca la necesidá d'implementar midíes de control p'amenorgar la so espansión y protexer la biodiversidá marina y los intereses económicos de la rexón.

Los investigadores señalen que se recoyeron un total de 73 exemplares nos distintos puntos muestreaos, la mayoría (45) nel puertu d'Avilés. L'estudiu reveló amás la eXistencia d'una población d'esta especie reproductivamente activa (24 exemplares) na mariña asturiana, en concretO, nuna sablera cercana al puertu d'Avilés (La Peña del Caballu).

Entienden los investiadores que'l control de los posibles efectos adversos de Postentorogonia orbicularis como especie invasora veríase facilitáu pola naturaleza semiZArrada de los puertos d'Avilés y Xixón.