Deteníu en Francia Josu Ternera, históricu dirixente d'ETA, depués de 17 años fugáu

MADRID, 16 May. (EUROPA PRESS) -

José Antonio Urruticoetxea Bengoetxea, alies 'Josu Ternera', foi deteníu esti xueves depués de 17 años fugáu nuna operación na que participaron la Guardia Civil y el Serviciu d'Intelixencia interior galu, según confirmó'l Ministeriu del Interior.

La detención producióse nes primeres hores de la mañana na localidá de Sallanches, nos Alpes franceses. Llevaba prófugu de la Xusticia dende 2002, añu nel que protagonizó la so última aparición pública, en Xinebra, onde participó xunto Arnaldo Otegi nuna xunta con periodistes de l'Asociación de Corresponsales Acreitaos énte la ONU na sede de les Naciones Uníes na capital suiza.

Con Josu Tenral cai l'últimu líder simbólicu que-y quedaba a ETA una vez derrotada. La so vida trescurrió ente los cargos de representación pública y la clandestinidá, pero siempre al serviciu d'una organización na qu'exerció prácticamente toles funciones, incluyíu la de negociador nos procesos de diálogu fallíos col Gobiernu.

Hai agora un añu, el 3 de mayu de 2018, Urruticoetxea ufrió'l so últimu serviciu a la banda terrorista al participar xunto Soledad Iparragirre, 'Anboto', nel vídeu nel qu'ETA certificó la so desaparición. En concreto, ensertaron dos audios d'estos dos veteranos terroristes.