Los diputaos Pérez Macho y Fernández Bartolomé (Cs) ven reprobable'l comportamientu de Cuesta

UVIÉU, 29 Dic. (EUROPA PRESS) -

Los diputaos de Ciudadanos na Xunta Xeneral Laura Pérez Macho y Armando Fernández Bartolomé calificaron esti martes el comportamientu del conceyal d'Urbanismu d'Uviéu y coordinador de Ciudadanos n'Asturies, Ignacio Cuesta, de "mui pocu éticu, mui pocu estéticu y reprobable políticamente".

Asina se refirieron a la decisión del Xulgáu de lo Contencioso-alministrativo númberu 3 d'Uviéu que decretó la "incompatibilidá" del primer teniente d'alcalde y conceyal d'Urbanismu, Ignacio Cuesta, de "tener dedicación esclusiva nel Conceyu y compaxinalo col so llabor nel exerciciu de l'abogacía nel ámbitu priváu".

Pa los parllamentarios, resulta "impropiu del máximu dirixente d'un partíu como Ciudadanos, que se presentó a les urnes con un estandarte de tresparencia, llimpieza y bon gobiernu al que Cuesta nun supo ser fiel nin dos años".

"Tanto él como'l señor Alfredo Canteli tienen que salir y dar una esplicación convincente a los uvieinos, revertir dende mañana mesmu la situación que la sentencia declara non d'alcuerdu a la llei y pidir esculpes", sostienen dambos diputaos nun escritu.

Igualmente, Pérez Macho y Fernández Bartolomé entienden que tien qu'esixise a Ignacio Cuesta, "como principal cargu orgánicu de Ciudadanos Asturies y tamién como'l cargu institucional más importante de los que desempeña'l nuestru partíu nesta Comunidá Autónoma (teniente de Alcadía d'Uviéu), que "acate la sentencia nos sos términos, evitando'l recursu, y devuelva lo más ceo'l dineru cobráu indebidamente a los uvieinos" y repare'l "dañu causáu a la imaxe pública del nuestru partíu y actúe d'equí p'alantre cola exemplaridá y col respetu a la moralidá pública que, como diz la sentencia, nun supo tener".