UVIÉU, 27 Sep. (EUROPA PRESS) -
La IV Residencia Asturies de lliteratura qu'impulsa la Conseyería de Cultura, Política Llingüística y Deporte yá tien residente pa esta edición: Patricia Suárez (Mieres, 1999), que va disponer d'un mes d'estancia n'A Coruña pa desenvolver el so proyectu lliterariu en llingua asturiana.
El xuráu compuestu pol poeta Milio Ureta, la normalizadora llingüística Penélope Miranda y l'escritor Miguel Rojo decidió por unanimidá conceder nesti 2024 la beca a la escritora moza Patricia Suárez pol so proyectu poéticu Xenero Disputa.
Nel so fallu, el xuráu destacó la propuesta escoyida por ser "la candidatura más contemporánea y orixinal" al traviés de "una propuesta trabayada y estructurada, de gran ambición intelectual y artística". Amás, tien interés especial "la deriva performativa y escénica de la propuesta, que-y da al proyectu un gran valor artísticu".
Con esta propuesta, Suárez va tratar la idea del xéneru como construcción social al empar que la orientación sexual dende la perspectiva del xéneru mentáu. D'esta forma, la obra resultante va dialogar col ensayu de la filósofa Judith Butler El xéneru en disputa (1990), incorporando cites de la obra de l'autora americana y rellacionándoles con un poema. Too esto, ensin perder de vista la base ficcional y la estilística del versu con un sentíu críticu.
Patricia Suárez (Mieres, 1999) ye graduada en Llingua Española y les sos Lliteratures pola Universidá d'Uviéu. Máster de Profesoráu d'Educación Secundaria y Formación Profesional, agora realiza la so tesis doctoral sobre la recepción del Quixote na novela española contemporánea na mesma universidá asturiana.
Nel ámbitu poéticu, esta mierense moza publicó trés llibros: 'Limerencia' (2017), 'La flor cortada' (2018) y 'La genealogía de los espejos' (2023). El pesu del currículum y el percorríu académicu de Patricia Suárez ye de gran interés y la so figura encarna l'espíritu d'oportunidá, finalidá y la proyección inherente a la condición que la beca IV Residencia Asturies busca.
La beca Residencia Asturies de lliteratura asturiana en residencia tien como finalidá'l sofitu, promoción y estímulu de la creación en llingua asturiana col mayor rigor y escelencia. L'ayuda da-yos a escritores en llingua asturiana espaciu, tiempu, contestu y condiciones óptimes pa la escritura.
A la convocatoria pue presentase cualquier escritor o escritora en llingua asturiana o n'eonaviegu mayor de dieciocho años, con un llibru publicáu a lo menos.
La Conseyería de Cultura, Política Llingüística y Deporte sofita cada añu los gastos d'estancia de la persona que reciba la beca na Residencia 1863, allugada nel sitiu onde nació la Real Academia Galega y a pocos metros d'onde vivieron Emilia Pardo Bazán, Rosalía de Castro o Pablo Ruiz Picasso, na ciudá gallega d'A Coruña. Los anteriores ganadores d'esta beca foron los escritores Miguel Rodríguez Monteavaro, Pablo X. Suárez y Milio Ureta.
Andalucía
