Los especialistes que trabayen nel argayu del Güerna aseguren que va llevar tiempu solucionar el problema

UVIÉU 12 Nov. (EUROPA PRESS) -

El Ministeriu de Tresportes y Movilidá Sostenible informó esti llunes de les novedaes referentes al argayu qu'esti domingu dexaba cortada l'Autopista del Güerna. Asegura'l Ministeriu qu'especialistes en xeoloxía y xeotecnia, qu'esti llunes analizaron in situ el puntu nel que pasó, concluyeron que l'argayu tien una magnitú que va llevar tiempu solucionar el problema.

L'argayu obligó a esviar el tráficu per Payares. Asina, el Ministeriu indicó qu'énte l'alerta de vialidá iverniza conocida na zona de Payares, va reforciase con cuatro quitanieves adicionales la N-630 en Payares

Depués del argayu producíu, l'autopista AP-66, xestionada en concesión por Aucalsa, permanez cortada nel puntu kilométricu 76 en dambos sentíos de circulación y ta esvíandose'l tráficu pela N-630.

Sobre los trabayos que yá s'entamaron nel Güerna, destaquen que pa facer posible la continuación del tráficu per esta vía d'alta capacidá que comunica Asturies cola Meseta, va facese un bypass, de forma que pueda recuperase la circulación per una calzada con un carril pa cada sentíu.

Pa garantizar la seguridá, van ponese provisionalmente unes pantalles de protección dinámiques qu'impiden que argayos nuevos puedan algamar el bypass que se va a construyir.

Indiquen amás qu'esti llunes yá s'abrió un pasu na autopista pa que pueda pasar la maquinaria de caltenimientu qu'empiece los trabayos de retirada del material desprendío.