El fallecimientu de Yolanda Huergo conmociona'l mundu de la cultura asturiana

UVIÉU 6 Ago. (EUROPA PRESS) -

La Xunta pola Defensa de la Llingua, organización onde militaba Yolanda Huergo, o l'Academia de la Llingua Asturiana llamentaron esti xueves el fallecimientu de la conceyala y portavoz de Podemos-Equo Xixón.

Huergo, hasta la so entrada na política, yera una de les cares visibles del movimientu de defensa de la oficialidá de la llingua asturiana, polo qu'amás de nel ámbitu políticu, el so fallecimientu conmocionó al mundu de la cultura asturiana.

La conceyala xixonesa militaba nel movimientu de reivindicación llingüística dende los años noventa, momentu nel que se sumó a la Xunta pola Defensa de la Llingua y se convirtió nuna de les sos cares más visibles.

Huergo representó a esta asociación nel Conseyu Asesor de la Llingua Asturiana hasta la llexislatura pasada y trabayó con un grupu de xuristes na propuesta de reforma del artículu cuatro del Estatutu d'Autonomía que la Xunta pola Defensa de la Llingua Asturiana presentó a los grupos parllamentarios de la Xunta Xeneral.

Dende esta mesma entidá, depués del so fallecimientu destacaron nes sos redes sociales la so implicación cola organización y señalaron qu'agora "fai imposible pensar n'entamar nada ensin tenela a ella ehí, cola so implicación y la so capacidá de trabayu".

"Nun va ser lo mesmo ensin ti, pero cuando volvamos a la xera vamos tener mui presente na nuestra alcordanza'l to exemplu. Pues tar segura de qu'esi futuru nel que creyíes y pol que tanto lluchasti va llegar", indicó la Xunta pola Defensa de la Llingua.

Per otru llau, l'Academia de la Llingua Asturiana (ALLA) consideró la muerte de Yolanda Huego como "una gran perda pal movimientu de reivindicación llingüística y p'Asturies". "L'ALLA xúntase al dolor de la so familia y collacios", afirmó la institución na so cuenta oficial de Twitter.

P'acabar, Iniciativa pol Asturianu destacó d'Huergo que dedicó la so vida a la defensa de la llingua asturiana nel mundu de la cultura y de la política. "En tolos llugares nos que tenía voz facia usu del asturianu", señalaron al traviés de nota de prensa.