UVIÉU, 27 Sep. (EUROPA PRESS) -
'Indumentaria', el Concursu y Muestra de Traxes tradicionales asturianos que se celebra en Grau cada últimu domingu de setiembre llega a la so octava edición esti domingu a les 13.00 hores na Capiya de los Dolores.
Anguaño va haber 35 participantes que van enseñar los sos traxes nuna pasarela pa consiguir les lligues azules que premien a los meyor vistíos nes dos categoríes del certame: home y muyer. Un xuráu independiente formáu por Consuelo Riu, Amadeu Benavente, Costantino Menéndez y Héctor Díez van decidir, amás, seis premios en metálicu, patrocinaos por Caxa Rural d'Asturies.
El Día'l traxe'l país, al traviés del Concursu Indumentaria, axunta en Grau a los principales espertos en indumentaria tradicional asturiana coles persones que más trabayen polos traxes del país, nun alcuentru que promueve la puesta en valir d'esti patrimoniu cultural
Nel apartáu de Muestra del Concursu Indumentaria van poder vese un conxuntu de pieces del traxe'l país antigües procedentes de la zona central asturiana, en concreto de la parroquia de Perlora, nel conceyu de Carreño, que componen un vistíu completu de muyer. Toes elles --con un sieglu y mediu de vida--, proceden del legáu d'una mesma familia.
Pela tarde, a partir de les 17.00 na Plaza del Mercáu va haber música con pandereteros y baille, onde se va presentar l'Asociación de Folclore 'La Flor de Grau'. Con too, los actos van empezar a les 11.00 de la mañana na plaza del Conceyu con 'Menudu traxín, xuegos tradicionales pa neñes y neños'.
Andalucía
