UVIÉU, 15 Jul. (EUROPA PRESS) -
Un grupu de 35 cineastes asturianos presentó esti llunes un manifiestu a favor de la oficialidá del asturianu y del gallego-asturianu onde recuerden que'l reconocimientu d'esti marcu llegal va pareyu al desarrollu económicu y social d’un territoriu como pasó comunidaes vecines como Galicia, Valencia, Isles Baleares, País Vascu o Cataluña.
Nesi sentíu, destaquen qu'estos territorios vienen desendolcando una producción cinematográfica de muncha calidá mandándose de los idiomes propios y asitiando n’espacios internacionales de prestixu a la so comunidá cultural.
Ente los firmantes del manifiestu ta'l guionista y director Sergio G. Sánchez, ganador d'un premiu Goya, acompañáu de nomes como José Antonio Quiros, Gonzalo Tapia, Luis Trapuello, Luis Argeo, Teresa Marcos, Tito Montero, Ángeles Muñiz o Diego Llorente.
Ente'l debate sobre la reforma del Estatutu d'Autonomía, los firmantes recuerden el "riesgu evidente de desapaición" del asturianu, que supondría "una perda descomanada pal futuru de la sociedá asturiana".
Amás, destaquen qu'un idioma ye una de les ferramientes más clares que tien el cine pa destacar la so pertenencia a una comunidá cultural concreta. "Les llingües propies d’Asturies ayúdennos nel nuestru trabayu creativu a consiguir un retratu más exactu del país nes nuestres películes, a alcontrar una definición contemporánea de la identidá colectiva de los asturianos", afirmen.
Por eso, reclamen la oficialidá pa reconocer los derechos de les persones que quieren usar l'asturianu, pero tamién como cineastes, porque "la falta d’oficialidá ponnos en situación de desventaya a la hora de buscar financiación pa les nuestres películes fuera del territoriu". Asina, reclamen a les fuercies polítiques con representación parllamentaria, sobre manera a PP y Foru Asturies, a que se se sumen a la reclamación de la oficialidá pa "dar solución a esta anomalía llegal que la sociedá asturiana lleva años soportando".
Andalucía
