Higiénico Papel, La Compañía del Alba, Ambigú Media y Elektrafiktion, van competir nel VIII Premiu Nel Amaro de Teatru

La obra ganadora va decidise nel festival que se va celebrar a lo llargo del mes d’ochobre nel Teatru Filarmónica d’Uviéu

UVIÉU, 1 Jul. (EUROPA PRESS) -

Les obres teatrales de les compañíes Higiénico Papel, La Compañía del Alba, Ambigú Media Broadcast y Elektrafiktion son les cuatro que pasaron a la final del VIII Premiu Nel Amaro de Teatru Profesional en llingua asturiana y gallego-asturianu.

Les propuestes de les compañíes asturianes finalistes nesta edición son 'Gasolina con capullos', d’Higiénico Papel; 'Perendi', de La Compañía del Alba; 'Amanda y les castañes máxiques', d’Ambigú Media Broadcast; y 'Formigues' d’Elektrafiktion.

Esti gallardón, entamáu pola Conseyería de Cultura, Política Llingüística y Deporte y con una dotación económica de 6.000 euros, tien como oxetu premiar la meyor obra en llingua asturiana o gallego-asturianu, d’alcuerdu con criterios de calidá escénica, lliteraria y llingüística.

Estos criterios valoráronse pol xuráu presidíu pol director xeneral d’Acción Cultural y Normalización Llingüística, Antón García, y nel que participaron como vocales l’actriz y filóloga María Cotiello, la escritora y filóloga Pilar Fernández, l’escritor y actor Milio Ureta, l’escritor y profesor Xuan Santori y l’actriz y crítica teatral Eva Vallines. Tocante a la secretaría del tribunal, tuvo ocupada por Juncal Mónica García Velasco.

Depués d’esta primer fase na que s’escoyeron les obres finalistes, va facese’l VIII Festival Nel Amaro de Teatru Profesional en Llingua Asturiana, que se va celebrar nel Teatru Filarmónica d’Uviéu tolos vienres del mes d’ochobre. Amás de les cuatro pieces teatrales finalistes, súmase a esti festival la obra ganadora na edición del 2023, 'El gorrumbu', de Saltantes Teatro.

Nel festival mentáu va decidise la obra teatral ganadora que, amás de la dotación económica del premiu, va integrase nel circuitu Autores nel Camín del programa Asturies, Cultura en Rede.

Esti premiu y festival lleva’l nome de Nel Amaro n’honor y reconocencia al autor fallecíu nel 2011 que, a últimos de la década de los setenta del sieglu pasáu, abrió’l camín pa la vanguardia teatral n’asturianu. Ente los sos proyectos escénicos destaquen Xénesis o alborá de la concencia (1978); Glayíos nueos, vieya murnia (1979); L’únicu rebalbu (1980) y Antígona, por exemplu, que ganó’l premiu de teatru de l’Academia de la Llingua Asturiana en 1991. Les manes en caxón (2003) foi la so última publicación teatral.