Iniciativa pol Asturianu crea un buzón pa denuncies, suxerencies y felicitaciones sobre l'usu del asturianu

   UVIÉU, 11 Abr. (EUROPA PRESS) -

   Iniciativa pol Asturianu echa andar el Buzón del Asturianu, una nueva ferramienta gratuita abierta a tola ciudadanía pa "canalizar les quexes ante alministraciones, instituciones y empreses que vulneren los drechos llingüísticos de los falantes".

   Al traviés d'esti canal tamién se van poder treslladar "suxerencies, propuestes y felicitaciones a aquelles organizaciones que seyan un exemplu y den pasos alantre pa garantizar el drechu a vivir n'asturianu", según explica esti colectivu.

   El Buzón del Asturianu ta yá disponible na páxina web d'Iniciativa pol Asturianu. Les persones interesaes en comunicar cualequier asuntu "namás van tener que rellenar un formulariu, que van poder complementar con semeyes y documentos", detallen.

   La entidá comprométese a protexer l'anonimatu de les persones que se pongan en contactu, pero nun van almitir comunicaciones anónimes.

RECONOCER LOS PASOS ALANTRE NEL USU DEL ASTURIANU

   El presidente d'Iniciativa pol Asturianu, Iván Llera, destacó que dende va tiempu recueyen "una bayura de quexes y discriminaciones pol usu llibre del idioma" y por esi motivu quisieron dar visibilidá "a la represión llingüística".

   Llera recordó, tamién, que "Iniciativa pol Asturianu ye una asociación que quier trabayar en positivo" y que por esi motivu quieren "reconocer tolos pasos alantre nel usu del asturianu tanto nes instituciones públiques como n'espacios privaos".

   Con toles denuncies, suxerencies, felicitaciones y consultes recibíes, Iniciativa pol Asturianu va ellaborar "un informe añal", que va permitir "facer siguimientu de cuáles son les problemátiques que más afecten a la ciudadanía".