UVIÉU, 3 Jul. (EUROPA PRESS) -
Una revisión detectó un ordenador ocultu en dependencies del Conceyu de Xixón y del que se desconoz tanto la procedencia como la función que realizaba. El Gobiernu local punxo l'asuntu en manes de la Policía Nacional.
Según declaraciones mandaes a los medios pola alcaldesa de Xixón, Carmen Moriyón, una de les prioridaes del so Executivu foi la modernización de los sistemes d'información y la protección de datos, especialmente depués de que nel mandatu pasáu'l Conceyu sufriera un hackeo.
Por esti motivu, recordó, créose la Dirección Xeneral de Protección de Datos nel Conceyu y púnxose en marcha una auditoría interna pal control de tolos sistemes del Conceyu, gracies a la que s'atopó l'ordenador.
Moriyón destacó la importancia que tuvo cuntar con profesionales del nivel y la esperiencia de la directora xeneral de Protección de Datos. "El so trabayu foi y ye clave pa velar pola seguridá de tolos xixoneses. A la vista ta que la decisión de crear esta plaza foi un aciertu", afirmó.