Les alcaldíes brinden n'Uviéu por reforciar en 2025 la collaboración municipal pa impulsar la crecedera d'Asturies

UVIÉU 27 Dic. (EUROPA PRESS) -

La crecedera d'Asturies nel ámbitu turísticu, industrial, cultural, d'empléu y de población foi'l deséu compartíu esti vienres nel tradicional brinde de Navidá de les alcaldíes asturianes qu'anguaño se celebró n'Uviéu. Un oxetivu de desarrollu económicu y social que, dicen, pasa per reforciar en 2025 la collaboración municipal.

Asina lo espresaron nes sos intervenciones l'alcalde d'Uviéu y anfitrión de la copa navidiega, Alfredo Canteli; l'alcaldesa d'Avilés, Mariví Monteserín; l'alcaldesa de Xixón, Carmen Moriyón; y la presidenta de la Federación Asturiana de Conceyos (FACC), Cecilia Pérez, a la que se xunieron ediles, amás d'alcaldes y alcaldeses d'otres localidaes como Siero, Mieres o Les Regueres.

De desarrollu económicu y turísticu faló Canteli, qu'aprovechó pa pidir al restu de conceyos que se sumen pa que "Asturies, con Uviéu a la cabeza", sía Capital Europea de la Cultura 2031.

"Que la unión sía una realidá, que caún tiremos pol nuestru conceyu pero toos xuntos por Asturies", añadió l'alcalde d'Uviéu. Un planteamientu que foi bien acoyíu pol restu, porque coincidieron na importancia d'unidá d'acción del municipalismu asturianu.

Asina, Mariví Monteserín defendió la unidá y la cooperación como "garantía d'éxitu y progresu", poniendo como exemplu de retu consiguíu de forma colectiva'l reconocimientu de la 'Cultura sidrera asturiana' como Patrimoniu Cultural Inmaterial de la Humanidá pola Unesco.

"Asturies ábrese al mundu como un territoriu afayadizu nel so conxuntu", apuntó l'alcaldesa d'Avilés, pa incidir en que'l Principáu ta consolidando una capacidá de crecedera como rexón de les mayores d'Europa.

L'alcaldesa de Xixón, per otru llau, argumentó qu'esta copa navidiega ye una "espresión gráfica de lo que representa'l municipalismu" n'Asturies.

D'esta manera, Moriyón quixo reivindicar que l'autonomía municipal nun ta reñida cola collaboración institucional ente alministraciones en favor del interés xeneral.

Tamién destacó l'ambiente de cordialidá y concordia del brinde la presidenta de la FACC y espera qu'esa sintonía bona se tresforme en collaboración frente a los desafíos de 2025 con enfotu, motivación y determinación, amás d'una "dosis bona d'optimismu".

Nesi sentíu, comentó qu'Asturies lleva dos años ganando población, dalgo que cree esencial pa impulsar el dinamismu social y económicu. Sicasí, mentó los "nubarrones escuros" qu'hai sobre la industria del aceru, polo que deseya que la perda de carbón suponga aceru verde o otres alternatives.

Amás, Cecilia Pérez apostó por garantizar unos servicios públicos de calidá pa la ciudadanía y tamién apuró un modelu nuevu de financiación local.

El brinde incluyó tamién un intercambiu de presentes: sidra, pola FACC; bombones de 'Peñalba' d'Uviéu; una cesta con conserves, quesu de La Peral y llonganiza d'Avilés; y 'princesines' de la confitería xixonesa 'La Playa'.