UVIÉU, 4 Dic. (EUROPA PRESS) -
El conseyeru d'Educación y Cultura, Genaro Alonso, anunció esti martes que los primeros examenes oficiales d'asturianu van ponese en marcha en 2019 y que son un "oxetivu irrenunciable" del Executivu autonómicu.
Asina lo indicó Alonso na Comisión d'Educación y Cultura de la Xunta Xeneral, onde presentó les cuentes de la so cartera recoyíes nel proyectu de Llei de Presupuestos pa 2019 y onde faló del procesu que ta faciendo la Conseyería d'Educación y Cultura pa poder acreitar el nivel d'asturianu de les persones adultes d'una manera oficial.
Foi depués de que la diputada de Podemos Lucia Montejo interrogára-y por una cuestión que consideraba "fundamental " pal asturianu. Alonso esplicó que'l decretu ta nestos momentos n'información pública'l y que ye un "oxetivu irrenunciable" que van poner en práctica a lo llargo de 2019.
Cola so puesta en marcha, l'asturianu va tener cinco niveles de competencia adaptaos al Marcu Común Européu de Referencies de Llingües. Estos niveles van ser el básicu A1, básicu A2, intermediu B1, intermediu B2 y avanzáu C1. En caún va haber una prueba de certificación qu'acreite'l nivel de comprensión y espresión oral y escrita en llingua asturiana.
